Bag-ong teams gisubha'g daog sa Power Forty summer league

CEBU, Philippines - Nagmangtas sila si Eric Caballero ug Nestor Javierto aron pangulohan ang bag-ong team Precious Ellah ngadto sa kulbahinam nga kadaugan batok sa Water Market, 84-82 sa pagsugod sa tinuig nga Power Forty summer basketball league didto sa Talisay Sports Complex.

Si Caballero mibahog og 28 puntos, samtang si Javierto miposa’g 21 puntos lakip ang mga krusyal nilang tirada sa daginutong oras aron salbaron ang ilang team.

Ang Precious Ellah, usa sa tulo ka bag-ong teams sa torneyo. Ang laing duha mao ang F&E Electrical Supply ug Allyn & Sons. 

Si CESAFI referee Edwin Dejacto nakapasulod og upat ka triples aron pangulohan ang Water Market pinaagi sa iyang 17 puntos, samtang laing upat niya ka teammates ang miamot sab og double figures.

Midaog sab ang UTASSCO ni Atty. Flor Yosores batok sa Park ‘N Go Bakeshop sa iskor nga 90-86, samtang ang F & E Electrical Supply mipakaging sa Allyn & Sons sa iskor nga 76-65.

Si Alex Mercado mikadlit og 30 puntos alang sa UTASSCO ug si Wilber Cabrera midugang og 20 puntos.

Sa laing bahin, ang F&E gipangulohan ni Bobby Pacquiao kinsa miposa’g 19 puntos.

Unang duwa:

Precious Ellah (84) - Caballero 28, Javierto 21, Cabañero 14, Traya 8, Nacario 5, Navares 4, Abarquez 4

Water Market (82) - Dejacto 17, Bughao 14, Dela Rama 13, Eleguin 12, Dacalos 10, Labalan 6, Yosores 6, Cayacap 4

Ikaduhang duwa:

UTASSCO (90) - Mercado 30, Cabrera 20, Yosores 16, Nacional 8, Atillo 6, Yu 4, Alob 4, Pestaño 2

Park ‘N Go (86) - Arias 19, Layon 13, Ozon 12, R. Rama 12, G. Rama 11, Echavez 10, Dejarme 5, Lalican 4

Ikatulong duwa:

F & E (76) - Pacquiao 19, Abasolo 13, Tabar 11, Mabalcon 10, Cabatas 8, Kalinga 6, Mosqueda 4, Cabrera 3, Navares 2

Allyn & Sons (65) - Vernaiz 20, Albaño 11, Tabar 9, Moniva 8, Reyes 5, Lisondra 4, Colinares 4, Gabuya 2, Sabejon 2. – BANAT NEWS