CEBU, Philippines - Moabot karon dinhi sa Sugbu ang Barangay Ginebra Kings ug ang Alaska Aces alang sa usa ka out-of-town game nga uloha'g "PBA Duwa sa Sugbo" ugma sa alas-5:30 sa hapon diha sa Cebu Coliseum.
Ang Kings gikatakdang moabot sa alas-11 sa buntag, samtang ang Aces sa ala-1 sa hapon ug temporaryo silang mopuyo sa Waterfront Cebu City Hotel and Casino sa Brgy. Lahug.
Ang Kings mopahigayon og Fan's Day karong alas-5 sa hapon diha sa SM City-Cebu Activity Center. Apan kadto lang adunay mga tiket sa duwa ugma maoy tugotan nga makasalmot sa Fans Day.
Ang "PBA Duwa sa Sugbo" usa ka proyekto sa Metro Cebu Uptown Jaycees Inc. (JCI) pinangulohan sa ilang presidente Carlos Porras. Si JCI senator Dr. Boy Te, maoy overall chairman sa nahisgutang promosyon.
Usa kini ka fund-raising campaign ug ang makita niini ilang idonar ngadto sa Jesus S. Avila Foundation, Inc. nga maoy ilang napiling beneficiary.
Mohatag sab sila’g lima ka bag-ong wheelchairs ngadto sa mga disabled atol sa halftime sa duwa tali sa Kings ug Aces.
Gawas sa wheelchairs, may raffle sab nga pagahimuon diin ang mga fans makahigayon sa pagdaog og matahom nga mga premyo.
Sa pagka karon, ang Kings ug ang Aces parehong nagkupot og 6-4 nga baraha ug mabuak kini human sa ilang panagtigi ugma.
Ang Kings nga pangulohan sa ilang import Mildon Ambres, gilangkuban nilang Jayjay Helterbrand, Celino Cruz, John Ferriols, Billy Mamaril, Ronald Tubid, Rudy Hatfield, Sunday Salvacion, Willy Wilson, Yancy de Ocampo, Willie Miller, Enrico Villanueva ug Mark Caguioa.
Ang Aces pangulohan sab sa ilang import Diamon Simpson uban nilang Anthony dela Cruz, Brandon Lee Cablay, Cyrus Baguio, Joe De Vance,Kelvin dela Peña, Mark Borboran, Mike Burtscher, Reynel Hugnatan, Samigue Eman, Sonny Thoss, Lewis Alfred, L.A. Tenorio ug Larry Fonacier. – BANAT NEWS