CEBU, Philippines - Gitapos sa Buhisan ang ilang kampanya sa Cebu City Dancesport and HipHop Barangay Competition Circuit Season 2 championship bitbit ang duha ka golds ug usa ka silver aron mangu sa tanang finalists diha sa Cebu Coliseum.
Ang Buhisan nakakuha'g golds pinaagi nilang Rheneil ug Katrina Jabonero sa latin junior open ug Kim Mayorga ug Stephanie Joy Sevilla sa latin youth division.
Sila si Jimmy Jabonero ug Concepcion Gonzaga maoy mitunol og bugtong silver alang sa Buhisan.
Ang Mambaling maoy nagsunod sa Buhisan sa overall medal standings sa ilang usa ka gold, usa ka silver ug tulo ka bronzes. Ang gold nakuha nilang Roberto Paulia ug Ellaha Marie Marquez sa latin juvenile open.
Mi-okupar sa ikatulo ang Brgy. Apas nga mikabkab og usa ka gold, usa ka silver ug usa ka bronze. Ang bugtong bulawan naggikan nilang Crispin Sato ug Maria Luiza Dalda sa standard juvenile class.
Ang Guadalupe maoy mitungtong sa ikaupat nga adunay usa ka gold gikan nilang Joseph Miguel Cantilla ug Krissa Mae Canoog sa standard junior.
Ang Ramos mikabkab sab og usa ka gold pinaagi nilang Jamil Khayen Miñoza ug Jasmin Iris Pogoy, ang Mabolo mihakot og usa ka silver, samtang ang Poblacion Pardo mitiltil og usa ka bronze.
Sa HipHop competition, ang Apocalypse sa Punta Princesa maoy milangkat sa kampiyonato, ang United Crew sa Punta Princesa maoy mipahiluna sa ikaduha ug ang Realty Icon sa Tisa maoy nakakuha sa ikatulo. (BANATNEWS)