Mancio midesisyon batok ni Sardido

CEBU, Phillipines - Miiskor og usa ka unanimous decision nga kadaugan ang taga-Agusan Del Sur nga si Jerson Mancio batok sa produkto sa Vic Adriano Stable nga si Rocky Sardido sa main event sa Summit Fight Night niadtong miaging gabii didto sa SRP, ning syudad.

Nagsinukdanay pa sa ilang istilo ang duha ka boksidor sa nag-unang duha ka round, apan mikalit kaagresibo si Mancio sa tunga-tungang bahin sa away human siya mikonekta og mga solido nga kinumo ngadto ni Sardido.

Usa sa naghatag og pabor ni Mancio mao ang point deduction nga gipahamtang ngadto ni Sardido kinsa mi-low-blow ni Mancio sa round 9.

Human sa away, tulo ka mga hurado ang nagkahiusa sa iskor nga 97-93 pabor ngadto ni Mancio. 

Lahi sa main event, nahugyaw hinuon ang gatusan ka mga misaksi sa maong fight card human sa impresibong 6th round TKO sa Boholanong si Jomar Cordinillo batok ni Jaime Bermiso sa Jumao-as Stable sa Mandaue City.

Makabali’g gusok ang gibuhian ni Cordinillo ngadto sa lawas ni Bermiso sa opening round, gisundan sa nagpungasi nga kombinasyon nga maoy mipahunong ni Bermiso.

Midaog usab si Jerome Bontog sa Phil-Aust Gym, batok ni Melchor Abcede sa Tagbilaran City pinaagi sa technical draw human makahiagum og grabeng gisi sa kilay si Buntog sa nahibiling 1:58 sa round 2.

Nagpungapunga usab si Riel Mandate human gipauwanan ni Jefferson Reodeque og bangis nga kombinasyon nga maoy nakaaghat sa referee nga ihunong ang away sa 2:22 sa second round. 

Mikumpleto sa lista sa mga midaog mao si Albert Villacampa sa Bantayan kinsa midaog pinaagi sa unanimous decision batok ni Vic Adriano, Pedro Balaba kinsa mipatumba ni Ervin Yamo ug Manuel Lumantad kinsa midaog pinaagi sa unanimous decision batok ni JR Salvador. – BANAT NEWS