Chess exhibition sa Cebu Festival 2010

CEBU, Philippines - Usa si International Master Kim Yap sa mopakita'g dinungang chess exhibition, nga usa sa mga highlights sa Cebu Festival 2010 karong Mayo 8 diha sa South Reclamation Properties (SRP).

Si Yap, kinsa dili pa dugay miabot dinhi gikan sa Malaysia, maoy usa sa masanagong chess players sa nasud karong panahona.

Libre ang registration niini ug makadawat sab og mga ganti ang tanang players, kinsa makapilde ni IM Yap.

Niadtong buot mosalmot, giawhag sa pagdala sa ilang kaugalingong chess sets.

Adunay t-shirts nga ihatag alang niadtong sayo moabot.

Sa dili pa ang chess exhibition, himuon una ang blitz tournament nga sugdan sa alas-2 sa hapon.

Aduna kini registration fee nga P50. Ganting salapi ang madawat sa top performers.

Ang kampiyon mobulsa og P3,000, ang second placer makadawat og P2,500 ug ang third placer makaangkon og P1,000.

Mokapyot sa ikaupat ug ikalima, gantiha'g P500 matag usa.

Ang maong kalihukan gipaluyohan sa Rose Pharmacy Chess Club sa abag sa FIDE Arbiters, National Master Roger Abella ug International Arbiter Marvin Ruelan.

Alang sa dugang mga kasayoran, mahimong motawag ni Abella sa 0910-2686890 o di ba ni Ruelan sa 0916-4232335. – BANAT NEWS