Mambaling mihakot lima ka bulawan sa 7th leg

CEBU, Philippines - Nakuha sa Mambaling ang lima sa unom ka bulawan nga giandam nga igo na kaayo alang kanila aron maghari sa 7th leg sa Go Ching Hai-Martina Cup and ML Kwarta Padala Cup Dancesports and Hip-Hop Circuit Season 2 diha sa Atillo gym sa Brgy. Punta Princesa, ning siyudad.

 Ang Mambaling nga misakmit usab og upat ka silvers ug tulo ka bronzes, gipangulohan sa tandem nilang Daryn Suarez ug Danica Cabanes, kinsa naka double-gold sa juvenile standard ug latin event.

Sila si Suarez ug Cabanez maoy mipatigbabaw batok sa ilang teammates Roberto Cañiban ug Ellah Marie Marquez ug Guadalupe tandem nga sila si Joseph Tinio ug Hanna Ricafranca.

Ang Mambaling mao sab ang mi-okupar sa top three spot sa youth standard division pinaagi nila ni Robby Masocol ug Namue Santillan sa unang dapit, samtang ang tandem nila ni Jon Maurice Behena ug Niza Zanoria mao ang nahimutang sa ikaduha, gisundan nilang Giovanni Carlos ug Wendlyn Estenor sa ikatulong dapit.

Sila si Jubert Lu Suico ug Rommelyn Manto mao ang mihatag sa ikalimang bulawan sa Mambaling human sila mirampa sa junior latin category.

Ang Guadalupe nakakuha usab og bulawan sa junior division sa modern standard discipline kortesiya nilang Joseph Miguel Cantilla ug Krissa Marte Canoog.

Ang Pardo’s United Crew mao usab ang mikampiyon sa hip-hop competition.   (BANATNEWS)