CEBU, Philippines - Napanalipdan sa host-Don Bosco ang ilang balwarte dihang nanghawod kini sa duha sa upat ka kategoriya sa 7th Don Bosco Football Festival diha sa barangay Punta Princesa, ning siyudad.
Ang Don Bosco midemolis sa Giuseppe, 3-0 aron pag-angkon sa 10-under crown ug dayon ilang gisirohan ang Bright Academy, 1-0 aron bitbiton ang 8-under title.
Hinuon, ang Bright Academy nakabawos ngadto sa Don Bosco pinaagi sa penalty shootout aron paghari sa 14-under category.
Sa laing bahin, ang University of San Carlos (USC) mipukan sa Carshenian aron dominaron ang ladies open.
Human sa festival-type tournament, ang 11-a-side ug futsal competition (indoor football) ang duwaon diha gihapon sa DBTC.
Gawas sa football, ang basketball ug volleyball ang pagaduwaon sab sa nanghinapos nga bahin ning bulana nga tipik sa Founder's Day celebration sa Don Bosco. (BANATNEWS)