Melindo, Banal mo-KO sa ilang kontra

CEBU, Philippines - Pulos mibahad ang ALA Boys nga sila si Milan 'Melinyo' Melindo ug AJ 'Bazooka' Banal nga tumbahon ang tagsa-tagsa nila ka mga kaatbang sa “Bakbakan sa Sinulog!” boxing card ugma didto sa Pacific grand ballroom sa Waterfront-Cebu City Hotel and Casino sa Brgy. Lahug, ning siyudad.

Ang undefeated nga si Melindo (19-0, 5KOs), kinsa nagtinguhang mosakmit sa ikatulo niyang regional title sa tulo ka managlahing dibisyon makigharong sa Amerikanong fighter Anthony 'Baby Assassin' Villareal (9-2, 4KOs) alang sa WBC Intercontinental Youth flyweight title.

Samtang si Banal (20-1, 16KOs) moharong sa gikalisangang si Cecilio 'Boga' Santos Galindo (24-11-3, 14KOs) sa usa ka 10-rounder bout sa super flyweight division.

Sa press conference kagahapon didto sa Aegean Room sa Waterfront, nagbinayloay og mga mainit nga pulong sila si Melindo ug Villareal.

Ang ALA fighter nga si Melindo nanganti nga patumbahon si Villareal sa ilang sangka ug iya kining idalit ngadto sa mga Sugbuanon nga motan-aw sa iyang away, apan ang 22-anyos nga si Villareal mibawos sab pinaagi sa pag-ingon nga maglisud si Melindo kaniya tungod sa iyang kapaspas ug kakusog.

Sa iyang bahin, ang garbo sa Brgy. Ermita nga si Banal misaad nga ipabuhagay niya tanan niyang kusog aron iyang matumba og sayo si Santos.

Sumala pa ni Santos nga gamiton niya ang iyang kasinatian aron mapilde si Banal. Usa sa naghatag og kadasig ni Santos aron paludhon ang Sugbuanong boksidor mao ang damgo niya nga mosaka ang world ranking. 

Gawas ni Banal, laing mga sikat nga boksidor nga nakasangka na ni Santos naglakip nila ni WBO super flyweight titlist Fernando Montiel, kanhi IBF jr bantamweight crown-holder Dmitri Kirilov ug Luis Melendez, kinsa mao ang responsable sa pagkabugto sa karera ni Z 'The Dream' Gorres.

Sa undercard, laing ALA Boys nga sila si James Bacon ug Larry 'Bonjovi' Canillas, ang mopakita’g aksiyon batok sa mga bisitang Thai boxers. Si Bacon (13-1-0,8 KOs) makigbinukbukay ni Thittichon Singwancha (12-3, 2KOs), samtang si Canillas (11-1, 11KOs) mosukod sa abilidad ni Pet Twin Gym (8-3-1, 6KOs).

Mokompleto sa undercard bouts mao sila si Jojo Intor sa Negros Occidental batok Romnick Hoybia sa Bohol ug Jonel Gadapan sa Cagayan de Oro batok Jayson Inso sa Mandaue City.

Ang mga tiket nagkantidad og P1,500 alang sa VIP first row, P1,250 sa VIP second row, P1,000 sa VIP third row, P500 sa ringside, P300 sa ballroom ug P250 alang sa balcony. – BANAT NEWS