CEBU, Philippines - Gisugat og kapildihan ang unang duwa ni Arex Montalban dihang gibalian siya ni Cesar Yarte sa Mixed Martial Arts (MMA) event nga giulohan og “Octagon Fury” niadtong miaging gabii diha sa Mandaue Sports Complex.
Mipakita og ka-agresibo ang kanhi boxing champion nga si Yarte dihang iyang gidumog si Montalban dayong bali sa kamot sa nahabiling dos minutos sa unang round nga maoy nakapaaghat sa referee sa paghunong sa away.
Sa maong kadaugan, si Yarte nagpabiling walay pilde sa lima ka duwa sa lightweight division.
Usa ka dakung upset usab ang gihimo sa taga-Iloilo nga si Leonard Delarmino dihang iyang gipahunong ang Sugbuanong si Kid Oraiz sa unang round sa ilang bantamweight bout.
Nagpungasi nga kumo ug patid ang gipabuhagay ni Delarmino nga maoy mipahagsa ni Oraiz sa tunga-tungang bahin sa unang hugna. Gihunong sab sa referee ang away dihang nalup-og na si Oraiz, kinsa nakatagamtam sa labing una niyang kapildihan.
Namawi hinuon ang laing Sugbuanon nga si Junrey Soquete dihang iyang gipahunong si Rey Delara pinaagi sa usa ka makalilisang nga rare naked choke aron masakmit ang daog sa featherweight division.
Impresibo usab ang gipakita ni Muay Thai Cebu president Michael 'Mikmik' Arquillano dihang iyang gipukan ang MMA fighter nga si Jennifer Biocales sa Iloilo. Gipamatud-an ni Arquillano nga gawas sa kickboxing, aduna usab siya'y igong katakus nga mogamit sa estilo nga grappling dihang iyang gibalian si Biocales sa unang round.
Lain pang mga mananaog mao ang teammate ni Arquillano nga si Albert Sumindo, Johnjier Torbiso, Edward Monteza, Rogelito Plomeda, Eric Areglado ug mga Sugbuanon nga si Danilo Teves ug Michael Gesta
Ang maong torneyo gipasiugdahan sa Extreme Combat Sports and the Fearless Fighting Championships ubos sa liderato ni Dino Tormis ug Rahkee Villarosa. (BANATNEWS)