MS Motosuit, SEL-J nag-usa

CEBU, Philippines - Misamot karon kalig-on ang labing dakung motocross series sa Kabisay-an -- MS Motosuit Motocross Series dihang ang Sel-J Sports ug SEL-J Pharmaceuticals nagtambayayong kanila alang sa dugang kalamboan sa motocross dinhi sa Sugbu ug sa tibuok nasud.

Sa usa ka press conference niadtong miaging gabii diha sa Regency Hotel Tower I, si MS Motosuit big boss Lou Ornopia ug SEL-J President Jay Lacnit pormal nga mipirma sa memorandum of agreement   timaan sa ilang panag-usa alang sa kalamboan sa motocross lukop nasud.

Lakip sa mga misaksi sa maong seremonyas mao si SEL-J Vice President Noel Fortin, National Sales Manager Gary Magdamit, Jun Estrada sa Castrol Philippines ug ang chief officer sa Lanao del Norte nga si Lyndon Galica.

Tungod sa maong pag-alyansa sa duha ka dagkung motocross organization, giatngan karon ang mas dagkung lumba sa nagkalain-laing dapit sa nasud. Upat dinhi sa Sugbu ug sa ubang bahin sa Kabisay-an ug tulo sa Manila ug Mindanao.

Ang SEL-J Sports nga giila na karon sa Philippine Sports Commission isip opisyal nga motocross organization nakigtinabangay usab sa MS Motosuit tv production aron ipasalida ang ilang mga lumba.

Gawas sa MS Motosuit, nadugang usab ang puwersa sa Motormate Group of Companies sa pagpangulo ni Carlos “Bong” Macazarte, kinsa misaad nga mopadayon sa pagsuporta sa MS Motosuit Motocross Series.

Sa laing bahin, ang 16th leg sa MS Motosuit Motorcross Series nga giulohan og "Mayor Patrick P. Bercenas Motocross Cup 2009" himuon karong adlawa didto sa Ramona Sports and Recreation Center sa Villa Anunang, Liboron, Carcar City.   (BANATNEWS)