Alelu Flores mirehistro og career-high 42 pts.

CEBU, Philippines - Misansan og siyam ka triples sa iyang career-high 42 puntos si Paul Alelu Flores lakip na ang crucial three-point play aron pangulohan ang Torn pagkudlit og 91-88 nga kadaugan sa double-overtime batok sa Cantila sa Association of Barangay Council (ABC) category sa Consolacion Fiesta Basketball Tournament diha sa Consolacion Sports Complex.

Nag-ong-ong na unta sa ganghaan sa kadaugan ang Cantila dihang milabaw kini og singko puntos, 82-77 sa nahabiling uno minuto sa duwa, apan ang Torn mi-rally dihang si Edmund Tibon nakahimo'g basket ug nasundan ni Flores kinsa mitusak og 3-pointer aron tablahon ang iskor, 82-all.

Sa overtime, si Nangka Brgy. Capt. Rey Cataluña mipasulod sa iyang jumper aron hatagan ang Torn og dos puntos nga bentaha sa nahabiling 13 segundos sa duwa, 84-82, apan subling nagtabla ang iskor, 84-all human   ang top gunner sa Cantila nga si Dayday miposa sa iyang buzzer-beating basket nga miresulta sa ikaduhang overtime.

Sa dugang singko minutos, ang sinaligan sa Torn nga si Neil Congson mihimo og sunod-sunod nga baskets sa wala pa si Flores mohimo sa iyang three-point play nga maoy mikandado sa kadaugan.

Ang Torn gilangkuban sa puwersa gikan sa barangays Tugbungan ni Tony Tumongha, Poblacion Oriental ni Liking Caylan ug Nangka ni Brgy. Capt. Rey Cataluña.

Si Congson mitimbre og 17 puntos samtang si Julius Napuli mitimang og 13 puntos alang sa Torn.

Si Reggie Lutao miantog og 23 puntos, gisundan ni Cabahug nga mihirit og 21 puntos, samtang sila si Dayday ug Herrera mitilok og 20 puntos matag usa alang sa Cantila nga gimaneho sa mga magduduwa gikan sa barangays Cansaga ni Peter Cabillada, Tilhaong ug Lamac ni Nestor Maglasang.

Ang duha ka bulan nga torneyo nga kabahin sa kalihukan sa tinuig nga kapistahan sa lungsod sa Consolacion karong Oktubre 29, hiniusang gipasiugdahan ni Consolacion ABC president Ma. Analee Gungob ug SK Federation chairperson Madel Hyacinth Herrera.

PUNTOS MATAG USA

Torn (91) - Flores 42, Congson 17, Napuli 13, Cataluña 9, Tibon 7, N. Lagahit 2, V. Lagahit 2, Tumongha 2

Cantila (88) - Lutao 23, Cabahug 21, Dayday 20, Herrera 20, Malunjao 4, Rosello 2   (BANATNEWS)