CEBU, Philippines - Gibirahan sa Lower Ramos ang R. Landon, 88-76 aron pag-angkon sa kampiyonato sa Jun Pe Inter-Sitio Fiesta Cup diha sa Benjamin Solon Memorial Gym, Barangay Cogon-Ramos, ning siyudad.
Si Mario Edaño Jr. mibugha og 27 puntos, samtang ang managsuong Alfafara nga sila si Darryl Dawn ug JR nagkumboya og 41 puntos aron pangulohan ang Lower Ramos, kinsa nilabaw og 13 puntos sa first quarter, 28-15.
Mihulga ang R. Landon dihang milusad kini og 15-9 rally sa pagpangulo nilang Christian Duarte ug Jomar Visitacion nga mipasulod og duha ka triples aron sapsapan ang labaw sa halftime, 48-40.
Hingpit nga nahanaw ang pangandoy sa R. Landon nga moilog sa titulo dihang mibalik og panghasi ang Lower Ramos aron palapdan pa ang labaw ngadto sa 15 puntos, 77-62 sa nahabiling sayes minutos sa duwa.
Gawas sa tropeyo, ang Lower Ramos mibulsa sab og P5,000, samtang ang R. Landon nakadawat og P3,000.
Puntos Matag Usa
Lower Ramos (88) - Edaño 27, D. Alfafara 24, J. Alfafara 17, Rodriguez 8, E. Aringuin 6, Rodriguez 4, Abayhon 4, M. Aringuin 2
R. Landon (76) – C. Duarte 38, R. Duarte 13, Visitacion 12, Lopez 8, Beronga 3, Daitol 2. – BANAT NEWS