UC Webmasters 3-0 na sa CESAFI

CEBU, Philippines - Ang higante sa University of Cebu (UC) Webmasters nga si June Mar Fajardo mibugha og 26 sa kinatibuk-an niyang 28 puntos sa second half aron pag-ihaw sa University of Southern Philippines Foundation (USPF) Panthers, 83-72 sa 9th Cebu Schools Athletic Foundation Inc. (CESAFI) basketball season niadtong miaging gabii diha sa Cebu Coliseum.

Mga Duwa Karon (Cebu Coliseum)

4:30 pm UV vs. CEC (Jrs.)
6:00 pm UV vs. CIT (Srs.)

S Janssen Abella mitampo og 14 puntos ug ang kanhi USPF Panther nga si Moncrief Rogado midugang og 11 puntos alang sa Webmasters ni coach Roel Gomez nga mikutlo sa ilang ikatulong sunod-sunod nga daog nga maoy labing nindot nilang sinugdanan sukad namugna ang CESAFI siyam na ka tuig ang milabay.

Wala kaayo makabuylo si Fajardo sa first period ug gipalingkod kini sa second quarter hinungdan nga nakabentaha og dos puntos ang Panthers sa halftime, 35-33. Gani ila pa nga giinat ang labaw, 37-33 sa third quarter human sa basket ni Elwin Durano.

Apan mao kadto ang labing layo nga naabtan sa Panthers tungod kay hinay-hinay nga nagpauwan og puntos ang Webmasters. Ug niadtong tungora, wala na kapugngi ang pagmangtas ni Fajardo sa undergoal diin nagpista siya batok sa mas mugbong kontra.

Daw sa naglisod una og pangitag paagi ang Webmasters unsaon pagtarong og pasa aron makadawat gyud si Fajardo sa ilawom. Dihang mi-epekto na ang ilang game-plan mikiat na og maayo si Fajardo ug wala na kini kapugngi pag-ani og puntos.

Sa katapusang singko minutos sa duwa, ang Panthers ni coach Raul Latonio Sr. daw miangkon sa ilang kapildihan ilabi na nga ilang mga higante nga sila si Arnel Fuentes, Nuevo Demo Filoteo ug Durano na-foul troubled batok ni Fajardo.

Ang Panthers, kinsa nagtangag 1-1 nga baraha gipangulohan ni Ellison Rivera sa iyang 27 puntos. 

Puntos Matag Usa

UC (83) - Fajardo 28, Abella 14, Rogado 11, Quilantang 6, Luceño 5, Juliane 4, Mohammad 3, Tano 2, Cayanong 2, Cabrera 2, Cueva 2, Miranda 2

USPF (72) - Rivera 27, Tinoy 11, Dajalos 8, Bardillas 6, Filoteo 6, Linao 5, Durano 3, Tabada 2, Ferraren 2, Manansala 2. – BANAT NEWS