Alelu's Friends naka-eskapo sa Capao Compound

CEBU, Philippines – Namunga ang paningkamot sa Alelu's Friends sa himalatyong oras dihang ilang naangkon ang 94-92 nga kadaugan batok sa Capao Compound sa Poblacion Oriental Barangay Developmental Basketball Sports Program didto sa Riverside open court sa barangay Poblacion Oriental, Consolacion.

Kanunay'ng naggukod ang Alelu's Friends lakip na ang otso puntos nga alkanse, 48-56 paghuman sa unang-duha ka kuwarter. Hinuon, ang Alelu's Friends mi-rally sa ikatulong kuwarter aron mapahakan ang labaw ngadto na lang sa dos puntos, 79-72 sa wala pa nila maangkon sa hingpit ang makutas nga kadaugan.

Si Jerome Valle maoy nangulo sa Alelu's Friends nga mitimbre og 29 puntos, samtang si Dars Medida mitimang og 18 puntos ug si Leemar Dahil mi-ariya og 13 puntos.

Sila si Valle ug Dahil pulos produkto sa M. Lhuillier Sports Development Foundation (MLSDF) Developmental League ubos ni multi-titled coach Eddie Ybañez.

Ang Alelu's Friends pulos sakop sa Consolacion Selection, kinsa nipahigayon og libreng basketball clinic nga gipasiugdahan ni Poblacion Oriental barangay councilor Paul Alelu Q. Flores.

Ang pilderong Capao Compound gipangulohan sab ni Bing Abrasado, kinsa mipupo og 18 puntos, gisundan ni Ryan Capao nga miani og 15 puntos.

Gipadagan ni commissioner Norbert Cejas, ang liga sa Riverside gipaluyohan sab sa Poblacion Oriental Barangay Council ubos sa liderato ni Brgy. Capt. Milquides Caylan.

Puntos Matag Usa

Alelu’s Friends (94) - Valle 29, Medida 18, Dahil 13, Bio 10, G. Pepito 7, Tibon 6, Pilapil 4, E. Pepito 3, Tuburan 2, Reuyan 2

Capao Compound (92) - B. Abrasado 18, R. Capao 15, Patigayon 13, Gerundio 10, A. Capao 10, A. Abrasado 10, Gonzaga 7, Abrasado 5, Juanillo 4 – BANAT NEWS