CEBU, Philippines – Naghinam-hinam ang mga molupyo sa Ayungon, Negros Oriental nga mosaksi sa 2009 MS Motosuit Motocross Series nga himuon ugma.
Ang 7th leg sa MS Motosuit Motocross action nga giulohan og "2nd Hon. Mayor Erwin Agustino Motocross Cup" maoy labing unang lumba nga gipahigayon gawas sa Sugbu.
"First time nato ni karong tuiga nga gawas sa lalawigan sa Sugbu ang atong lumba," matud pa ni event organizer ug MS Motosuit big boss Lou Ornopia.
Gipaabot silang 2008 rider of the year Seigfred Ornopia sa Keiz BJ Team, Jon-Jon Adlawa, Juvenille Abellar ug John Flores nga mohakot og laing titulo sa managlahing dibisyon.
Nagtinguha sab nga mosakmit og titulo sa ilang dibisyon sila si Gener Sicad, Paolo Inoc, Winsor Pamorca, Donkey Sanchez, Butch Flores ug Weng Yapparcon.
Mag-ilog sab sa titulo ang higpit nga karibal Earl Jean Brylle Ornopia ug BJ Pepito sa mini division.
Matud pa ni Ornopia nga iyang dad-on si national champion Glenn Aguilar aron mamahimong mabulokon ang maong kalihukan.
Sa iyang bahin, ang expert rider ug MS Motosuit Motocross TV host Pepo Rubi mibutyag nga dad-on niya ang tibuok Quickflight team nga pangulohan ni 2008 mini class champion Clark Wagas alang ning maong lumba.
Ang maong lumba gipaluyohan sa Castrol Philippines, Kier Louie's Motosuit Manufacturing, MS Digital Prints, Cebu Reliance Motors, Keiz BJ Motorsales, Cebu Progress ug sa Ayungon Municipal Council ubos sa liderato ni Mayor Erwin Agustino.
Ang 2009 MS Motosuit Motocross Series makita sa matag adlaw'ng Domingo sa alas-9 sa gabii pinaagi sa CCTN Channel 47. – BANAT NEWS