CEBU, Philippines - Kulbahinam nga aksiyon sa 1st M. Lhuillier Kwarta Padala Cup basketball tournament ang mahitabo karong adlawa diha sa Cogon-Ramos gym.
Ang 24/7 Convenience Store makigtakos sa star-studded Binglens squad sa main game nga gitakda sa alas-8:30 sa gabii, human sa duwa tali sa Asian College of Technology (ACT) Cyber Knights ug sa ADI Sportswear sa Lapu-Lapu City sa alas-7 sa gabii.
Seguradong eksplosibong aksiyon ang mapaabot sa duwa sa 24/7 Convenience Store batok sa Binglens kay gubat kini sa mga kanhi collegiate stars ug sa commercial veterans.
Ang 24/7 gipangulohan ni Mark Abadia, ang sinaligan sa PBL, kinsa miduwa sa Adamson University sa UAAP. Moduwa uban niya mao sila si USC Warriors Vernini Tangarorang ug Mark Ignatius Loyola.
Ilang harungon ang mas tag-as nga silang Michael Dumdum, Michael Almonte ug Max Delantes nga pulos mga beterano sa commercial league.
Matud pa ni tournament director ug M. Lhuillier marketing manager Michael Roma, nga ang maong torneyo mosubay og single round robin format diin ang top four teams mo-abante sa crossover semifinals.
Ang mga mananaog maoy mag-abot sa kampiyonato.
Ang makampiyon ning usa ka bulan nga torneyo nga gipaluyohan sa M. Lhuillier Group of Companies makadawat og P50,000, ang second placer makaangkon og P30,000 ug ang third placer mobulsa og P15,000.
Ang fourth placer makadawat og P5,000 isip consolation prize. – BANAT NEWS