Pagnanawon naghari sa unang adlaw

CEBU, Philippines - Nagkahayag ang damgo ni Jaypop Pagnanawon nga mamahimong sunod nga Sugbuanon nga kampiyon sa natad sa cycling.

Kini human niya gidominar ang unang lumba sa duha ka adlaw nga Padyak Pinoy Visayas-Mindanao qualifying event gikan sa Cebu City paingon ngadto sa Boljoon kagahapon.

Si Jaypop, anak ni Rolando Pagnanawon mi-oras og 2:09:6.76 aron dominahon ang 103 ka kilometro nga lumba.

Mitapos sa ikaduha si Albert Basirgo sa iyang 2:09:16.76, samtang ang ikatulo nakuha ni Earl Cadampog sa oras nga 2:09:26.76.

Mikompleto sa top five mao sila si Jovanni Delica ug Antonio Nebria.

Si Niño Surban, ang top qualifier sa 2007 Padyak Pinoy milaylo una ug wala mosalmot sa maong lumba. Si Surban bag-o pa nga midaog sa Singapore ug Malaysia.

Si Pagnanawon moatubang na sab og laing hagit sa ipahigayong Individual Time Trial (ITT) gikan sa Boljoon paingon sa Oslob ug balik sa Boljoon karong adlawa.

Ang modaog sa Visayas-Mindanao qualifying race mobatok sa mga riders gikan sa ubang bahin sa nasud sa Padyak Pinoy finals karong summer.

Ang tanang lumba adto pagahimuon sa Luzon. – BANAT NEWS