MANILA, Philippines - Ang delegasyong lalahok sa darating na 1st Asian Martial Arts Games na nakatakda sa Abril 25 hanggang Mayo 3 sa Bangkok, Thailand ang posibleng unang dadaan sa pinahigpit na patakaran ni Philippine Sports Commission (PSC) chairman Harry Angping.
Humihingi ang nasabing national contingent, pinamumunuan ni Philippine Amateur Judo Association (PAJA) president David Carter, sa PSC ng halos P6.5 milyon bilang pondo para sa pagsali sa naturang kompetisyon.
“I have not talked with Mr. Angping about our request but I’m hoping our new PSC chairman will consider our request considering this Asian Martials Arts Games will be used by our athletes as exposure for the upcoming 25th Southeast Asian Games in Laos,” katuwiran ni Carter.
Sa kanyang pag-upo bilang bagong PSC chief, sinabi ni Angping na magiging mahigpit siya sa pag-apruba ng pondo ng mga National Sports Associations (NSA)s na gustong lumahok sa ilang international tournaments.
Ayon kay Angping, gusto muna niyang malaman ang tsansa ng nasabing NSAs bago ito bigyan ng tulong-pinansyal.
“There are at least 113 events at stake but we are not predicting how would are athletes would perform since it is the initial staging of this higher level of competition,” dagdag ni Carter sa kompetisyong naghahanay ng mga sports na taekwondo, judo, karatedo, wushu, muay, kickboxing, pencak silat, kurash at jiujitsu.
Maliban sa 1st Asian Martial Arts Games, nakatakda ring sumabak ang bansa sa 1st Asian Youth Games sa Hulyo, sa 3rd Indoor Games at sa 25th Southeast Asian Games.
Naglatag na ang sports commission ng pondong P30 milyon para sa partisipasyon ng delegasyon sa 2009 Laos SEA Games sa Disyembre. (Russell Cadayona)