CEBU, Philippines - Nangandam na si Elona Dane Tormis sa University of Cebu (UC) nga mosagubang alang sa dakung hagit sa iyang career diin siya usa sa morepresentar sa nasud sa 2009 ASEAN Juniors Table Tennis Championships karong Hulyo sa Singapore.
Nakabaton og luna si Tormis ngadto sa Singapore human manganli sa national pool tungod sa iyang impresibong pasundayag sa miaging tuig nga national open didto sa kaulohan.
Ang batan-ong si Tormis maoy unang Sugbuana nga moduwa sa ASEAN Juniors ug ikapito sa tanang mga Sugbuanon.
Sa wala damha, ang tanang Sugbuanon kinsa nipakita'g aksiyon pulos nailawom sa kamot ni coach Jessica Jawad-Honoridez.
Ang unang-duha ka players ni Honoridez kinsa niduwa sa ASEAN competition mao ang managsuong Emmanuel ug Michael Motel ug gisundan nilang Jay Impuesto, Jonathan Jacalan, Benedict Gantuangko ug Dannel Jay Tormis, ang manghod ni Elona Dane.
Si Elona Dane mag-ensayo dinhi sa Sugbu ubos ni Honoridez.
Gawas ni Elona Dane, ang ubang mga tinun-an ni Honoridez, mayoriya niini naggagikan sa UC, kinsa nangandam sab alang sa umaabot nga mga torneyo. – BANAT NEWS