Banal, Amonsot daog didto sa Tagbilaran

Cebu - Duha ka mga ALA boys nga sila si AJ ‘Bazooka’ Banal ug Czar Amonsot, pulos miiskor og impresibong knock out batok sa mga Indonesian boxers niadtong Sabado didto sa Island City Mall car park.

Ang Sugbuanong knock out artist nga si Banal nipakita sa iyang kaidlas ug kapaspas aron luyahon ang Indonesian nga si Nouldy Manakane.

Usa ka makusog nga walang kumo ang nipahagsa ni Manakane sa second round, gisundan sa 1-2 combo nga maoy nakapaundang sa Indonesian sa nahibling 1:39 sa round four.

Sa iyang bahin, ang nagpangagot nga si Amonsot kinsa tinguha karong mubalik sa boxing scene, sayun ra kaayong nikilaw sa laing Indonesian nga si Zoel Fidal.

Ang Boholano nipahagsa sa iyang makusog nga kumo sa lawas ni Fidal maoy hinungdan sa pagkalup-og niini sa second round.Apan pag-abot sa fifth round, ang left-cross ni Amonsot ngadto sa t886sa Indonesian ang hingpit nga nitapos sa duwa.

Si referee Delbert Peligrino mihunong sa away dihang nakita niya nga dili na makaya sa Indonesian nga ipadayon pa ang away.

Sa undercard, ang local prospect nga si Ricky Sismundo miiskor og usa ka 8th round knockout victory batok ni Darryl Pucdol sa Wakee Salud Stable.

Si Along Denoy nidaug usab via 8th round unanimous decision batok ni Aljun Salogaol, nagtabla si Rocky Amonsot batok Sauel Galinato, Nidaog si Junel Barembao batok ni Ricky Nunez pinaagi sa majority draw,samtang si Powell Balaba miiskor og majority decision batok ni Jestoni Tunacao ug Romano Gelig kinsa nidaog usab pinaagi sa decision batok ni Eman Labanza. - Lemuel P. Maglinte (BANAT NEWS)