Cebu - Nagpabiling walay pilde ang Sta. Cruz Gallery, Sikad Talisay ug Cebu Progress Marketing human sa tulo ka rounds sa 2009 Cebu Sinulog Open Team Chess Tournament didto sa SM City-Cebu.
Sa pagsuwat niini kagahapon, ang tulo ka teams adunay nakahipos og sayes puntos sa unofficial standing.
Ang Sta. Cruz uban ni Carlos Cabuenas miduwa sa Board 1, nakasinati og lisud nga duwa batok sa Mabolo ug sa Visayas Surplus pagsugod sa torneyo, apan nakamaneho gihapon kini pagpukan sa duha ka teams.
Kagahapon, ang Sta. Cruz nakasugat gihapon og lisud nga duwa batok sa University of Cebu nga gipangulohan ni Kim Steven Yap apan ila gihapon nga napukan.
Ang Sikad Talisay mi-iskor sab og daog pinaagi sa pagpilde sa UC Women’s Team ug White Sands sa opening day ug kagahapon ilang gipilde ang undefeated OPASCOR.
Si Carlos Moreno sa Sikad Talisay mipukan ni Erwin Ababat sa OPASCOR sa Board 1, gipukan sab ni Gamaliel Regis si Joel Ababat sa Board 2, si Venerio Loyola midaog sa Board 4, samtang si Neil Lagutin napukan ngadto ni Joel Pacuribot sa Board 3.
Sa laing bahin, ang Cebu Progress Marketing nga gipangulohan ni Richard Natividad agresibo kaayong nakaduwa batok sa Lapu-Lapu Kids ug sa University of the Visayas sa unang duha ka rounds sa wala pa paludha ang Lapu-Lapu City squad sa third round kagahapon.
Sa nahabiling upat ka rounds sa pagsulat niini, ang ubang mga competing squads padayon pang nagtigi alang sa kampiyonato.
Katloan ug duha (32) ka teams ang mipakita’g aksiyon lakip na ang duha ka female squads nga mao ang UC ug Handuraw Pizza ug duha ka kiddie squads, - ang Balbona Kids ug Lapu-Lapu Kids.
Ang Cebu Executives and Professional Chess Association (CEPCA) maoy mipasiugda niining kalihukan uban sa suporta kagahapon sa siyudad sa Sugbu. – BANAT NEWS