New York gikilatan

Cebu - Nagdahunog ang Oklahoma Thunder nga gipangulohan nila ni Kevin Durant, Jeff Green ug Desmond Mason dihang ilang gipakuratan ang New York Knicks, 107-99 sa ilang engkuwentro kagahapon sa National Basketball Association didto sa Ford Center sa Oklahoma City, Oklahoma.

Sila si Durant ug Green parehong miburak og 27 puntos, samtang si Mason mihakot og 13 puntos alang sa Thunder kinsa nakatigum pa lang karon og 5-30 nga baraha, ang pinakaubos sa kinatibuk-ang NBA.

Ang Thunder nakalabaw og 23 puntos, 79-56 sa second quarter nga maoy labing daku nilang nahimo karon nga season ug ang lay-up ni Durant naghatag kanila og 83-62 nga labaw. Apan bisan pa niana, diriyot masikwati ang Thunder dihang nakan-an sa Knicks ang labaw.

Mi-aksiyon og rally ang Knicks dihang milusad kini'g 17-8 run nga nakapahiyos sa labaw sa Thunder ngadto na lang sa 12 puntos, 91-79 pagsugod sa fourth period. Apan wala makasustenir ang Knicks, kinsa bag-o lang nakapusoy sa Boston Celtics sa wala pa sila mobiyahe alang sa upat ka duwa sa Western Conference.

Si Al Harrington maoy nangu sa Knicks sa iyang 21 puntos, si Chris Duhon miamot og 18 puntos ug si David Lee mitampo og 14 puntos. Ang Knicks manulong karong adlawa sa Dallas Mavericks .

Suwayan karon sa Thunder pagkulit sa labing una nilang sunod-sunod nga daog karon nga season dihang ilang sulngon ang Minnesota Timberwolves didto sa Minneapolis, Minnesota.

Sa laing duwa, nasukarap na sab ang Celtics human miyukbo sa Charlotte Bobcats sa overtime, 114-106, samtang nabugto ang 15 ka daog sa Los Angeles Lakers sa ilang kaugalingong balwarte dihang nadisgrasya kini sa New Orleans Hornets, 105-116.

Mihagdaw og 40 puntos si David West, 15 niini gikan sa fourth quarter, samtang si Chris Paul mi-iskor og 32 puntos uban sa 15 ka assists aron puhalan ang 39 puntos ni Kobe Bryant nga maoy nangu sa Lakers.

Sa laing duwa, midaog ang Orlando Magic batok sa Washington Wizards, 89-80, gipakuratan sa Philadelphia Sixers ang Houston Rockets, 104-96, ang Minnesota Timberwolves midaog batok sa Memphis Grizzlies, 94-87, gisungag sa Chicago Bulls ang Sacramento Kings, 99-94 ug ang Mavericks midaog batok sa Los Angeles Clippers sa iskor nga 107-102. - BANAT NEWS