Cebu - Giharus sa Consolacion National High School (CNHS) Black Shama ang quarterfinal round dihang ilang gipukan ang MLSDF selection sa iskor nga 57-56 aron moabante sa semis sa 6th M.Lhuillier Kwarta Padala Under-21 Developmental Basketball League didto sa Consolacion Sports Complex.
Ang CNHS Black Shama moatubang sa Team RemEMBER ni Consolacion Vice Mayor Ember V. Alinsug uban og team manager Paul Alelu Q. Flores, ang mananaug moabante didto sa kampiyonato sa tulo ka buwan nga titulo nga gi-organize sa M.Lhuillier Sports Development Foundation executive director ug multi-titled coach Eddie B.Ybañez.
Ang Bracket B topnotcher nga MLSDF maoy nag-una sa sayong bahin sa duwa, 12-4. Apan wala magpaalkanse ang Black Shama dihang mihirit usab sila pinaagi sa pagpasulod sa ilang mga puntos aron ma-ilog ang labaw, 44-43 paingun ngadto sa final period.
Ang MLSDF selection nibawi sa labaw sa nahibiling 32 segundos, 56-55, apan si Lemuel Malagar nipasulod sa iyang lay-up sa nahibiling sais segundos sa duwa aron ihatag sa CNHS ang kadaugan.
Si Malagar nitigom og nuybe puntos, apan si J. Rio ang nahimong topscorer alang sa Black Shama sa iyang 25 puntos.
Puntos matag usa:
CNHS Black Shama (57)- Rio 25, Najarro 11, Malagar 9, Linao 5, Cadampog 4, Tibalan 3.
MLSDF (56)- Tabalin 13, Dinsay 10, Dauco 7, Dauco 7, Otia 7, Villanil 6, Panerio 4, Ybañez 3, Tulda 2, Banate 2, Ferrare 2.
Quarterscore: 8-12, 29-35, 44-43, 57-56. - Lemuel P. Maglinte (BANAT NEWS)