CEBU – Ang University of San Carlos (USC) Basic Education Department South Campus Parents Teachers Community Association, Inc. (USC- BED SC PTCA, Inc.) executive board ubos sa liderato sa ilang presidente nga si Dr. Hermes Ibon ug pinaluyohan sab sa sports committee, mohatag ug pasidungog ngadto kang Sally Mae Siso, ang second year high school student diha sa maong unibersidad.
Si Siso, nga kanunay makadawat ug award sa San Miguel Corporation- Sports Association of Cebu (SMC-SAC) hatagan ug usa ka libo nga cash atol sa pagpahigayon sa Family Day unya sa Disyembre 14.
Dili pa lang dugay, si Siso mihakot ug duha ka gold, 1 ka silver ug usa ka 1 bronze medal sa usa ka torneyo sa tennis didto sa Malaysia.
Si Saturnino Mayormita, Jr. ang sports coordinator sa USC BED SC nagpadala ug suwat ngadto kang Ibon nga nagrekomenda aron hatagan ug pasudungog si Siso tungod kay nakahatag man sab siya’g dakung dungog sa maong tunghaan.
Ang suwat ni Mayormita gitunol sab ni Mrs. Corazon Sasing, ang principal sa USC BED SC ngadto sa PTCA Inc. board atol sa ilang regular board meeting sa miaging Biyernes.
Tungod kay apeke na man sa oras, si Ibon nagkanayon nga ipauwahi na lang ug hatag ngadto kang Siso ang plaque of recognition. (Gabby G. Malagar) (BANAT NEWS)