Liloan hari sa Cebu Provincial Meet 2008

CEBU - Ang host Liloan ubos sa liderato ni Mayor Vincent Franco 'Duke' Frasco maoy nanghari sa Cebu Provincial Sports and Cultural Festival 2008 kagahapon.

Bisan ang Liloan nalandig sa ikaduha sa elementary division sa ilang 90 puntos, ila gihapon nga nakuha ang overall championship gumikan ang ilang secondary squad mao man ang mitongtong sa kinatas-ang dapit nga miposte og 113 puntos.

Sa kinatibuk-an, ang Liloan mirehistro og 203 puntos mipalagpot sa co-host Compostela ngadto sa ikaduhang dapit sa ilang 152.5 puntos ang front-runner Bantayan napunta sa ikatulo sa ilang 144 puntos.

Miokupar sa ikaupat nga dapit mao ang Balamban sa ilang 142 puntos, samtang ang defending champion Badian nalagpot sa ikalima nga adunay 124 puntos.

Mikompleto sa top 10 finishers mao ang Consolacion (107), Argao (87), Dumanjug (81.5), Alcantara (77) ug Asturias (66).

Sa secondary division, ang Bantayan maoy mipahiluna sa ikaduha sunod sa Liloan sa ilang 100 puntos, gisundan sa Compostela nga miposte og 92.5 puntos.

Kasagarang bulawan nga nakuha sa Liloan nagagikan sa secondary boys baseball ug sa volleyball.

Nanghawod sab ang Liloan sa archery, gymnastics ug football events. (Yoyo R. Abayan)

Nowitzki miburak 37 pts.

Si Dirk Nowitzki mibahog og 37 puntos sulod lamang sa tulo ka kuwarter sa iyang kinatibuk-ang 39 aron tunolan ang Dallas Mavericks og 112-97 nga kadaugan batok sa Phoenix Suns sa nagpadayong National Basketball Association kagahapon.

Daw giyawaan si Nowitzki ug walay nakapugong sa iyang pagpangatake bisan pa og si Shaquille O’Neal, Amare Stoudemire, Grant Hill ug Matt Banes pa ang mobantay niini.

Si Stoudemire maoy nangulo sa naparot nga Phoenix nga mikulit og 28 puntos, giabagan sab kini ni Steve Nash nga mipupo og 20 puntos uban ang 10 ka assists.

Ang huyang nga depensa sa Suns maoy usa sa hinungdan sa ilang kapildihan.

Si Nowitzki miburak og 14 puntos sa unang kuwarter, siyam sa ikaduha ug 14 puntos sa ikatulong kuwarter nga maoy nakapaawop sa Suns.

Sa laing duwa, si Tony Parker miligwat og 22 puntos, samtang sila si Tim Duncan ug Manu Ginobili mikamada og 21 puntos matag usa alang sa San Antonio Spurs kinsa mipukan sa Denver Nuggets sa iskor nga 108-91. (Yoyo R. Abayan)   (BANAT NEWS)