CEBU - Mikabkab og unom ka bulawan ang Bantayan sa duha ka dibisyon sa ikaduhang adlaw sa athletics event sa Cebu Provincial Sports and Cultural Festival 2008 kagahapon didto sa Liloan Central School track oval.
Ang elementary boys squad mihakot og duha ka bulawan kortesiya ni Jeorge Desamparado, kinsa naghari sa 400m hurdles sa oras nga 1:19.20 ug Joseph Garcia sa oras nga 5:22.48.
Si Junaline Layese mitunol sab og bulawan sa Bantayan sa girls 400m hurdles sa oras nga 1:1573.
Ubang mihakot og bulawan alang sa Bantayan mao sila si Vivencio Awit, Michael Alob ug Jesa Bautista.
Si Awit nanghawod sa discus throw event nga may gilay-on nga 27.49m, si Alob naghari sa 400m hurdles sa oras nga 1:2.49, samtang si Bautista mirehistro og 4.47m sa long jump.
Sa laing bahin, si Jhaye Rabia sa Minglanilla mikabkab sab og bulawan sa discus throw nga mirehistro og 19.52m.
Nakakuha sab og usa ka bulawan ang Daanbantayan ug Ginatilan kortesiya nilang Carine Gulfan sa girls long jump (3.78m ug Elenelyn Montecalbo sa girls 1,500m run sa oras nga 5:45.
Ang Catmon nakamina og duha ka bulawan gikan ni Vernie Aveja sa 3K run (10:17.33) ug Johndie Butillas sa 1,500m run (4:37.95). – BANAT NEWS