Ornopia double champ

CEBU - Mirehistro na sab og "double victory" si Seigfred Ornopia sa 13th leg sa 2008 MS Motosuit Motocross Series nga giulohan og Keiz BJ Cup" niadtong Domingo didto sa Caduawan, Tabogon.

Si Ornopia sa Keiz BJ Motorsales and Services katapusang niposte og dobleng kadaugan atol sa gipahigayong Ormoc National Competition niadtong Hulyo 6 didto sa Ormoc City.

Si Ornopia, ang manghod ni MS Motosuit big boss Lou Ornopia maoy nanghawod sa Executive A ug B, samtang ang Executive C nadaog ni Felipe Montejo.

Sa kasamtangan, si Ornopia mao karon ang nag-unang kandidato alang sa "Rider of the Year."

Sa laing bahin, sa labing unang higayon sa siyam ka legs nga iyang nasalmotan sa maong series, si Glenn Aguilar napilde sa pro action nga maoy naghatag og higayon ni Irwin-Ramas Uypitching paghari sa 13th leg ning tinuig nga kompetisyon.

Ang multi-titled nga si Aguilar maoy nag-una sa lumba human sa first heat, apan nakasugat kini og mechanical trouble sa second heat hinungdan nga nabiyaan kini.

Dihang mibalik gikan sa maong kakulian, naapsan niya ang ubang mga riders, apan wala kini makaapas ni Uypitching, kinsa naka-establisar na og komportable nga labaw.

Si Aguilar napunta sa ikaduhang dapit, gisundan ni Pepo Rubi, kinsa bag-o lang nibalik gikan sa Cabanatuan.

Hinuon, gibawi ni Aguilar ang kapildihan dihang iyang gidominar ang experts division. Si Rubi mipahiluna sa ikaduha, samtang si Uypitching nalabay sa ikatulong dapit.

Ang anak ni Aguilar nga si McLean, nakahatag sab og dungog sa iyang amahan pinaagi sa pagposte og sunod-sunod nga kadaugan sa mini-65 cc action.

Napuhalan niya ang anak si Ornopia nga si Earl Jean Brylle, kinsa nipahiluna sa ikaduhang dapit. Mitapos sa ikatulo mao si Tom-tom Narcosa.

Sama ni Seigfred Ornopia, sila si Ryan Quirol ug Donkey Sanchez milansang sab og kaluhang kadaugan. Si Quirol naghari sa novice open enduro ug sa open production, samtang si Sanchez nidominar sa novice open enduro ug local enduro classes.

Si Wensor Pamorca maoy milangkat sa titulo sa intermediate, samtang sila si Clark Wagas ug Weng Yapparcon mipuwesto sa ikaduha ug ikatulo nga dapit. (BANAT NEWS)