Donaire wala apektohi -- Guardo

CEBU - Gibutyag ni sports patron Jonathan ‘Atan’ Guardo nga bisan og wala na makaaway og dul-an na sa usa ka tuig si Fil-Am Nonito ‘The Filipino Flash’ Donaire, dili gihapon kini makaapekto sa iyang performance sa pagdepensa sa iyang IBF/IBO flyweight titles batok sa challenger niining si Moruti ‘Babyface’ Mthalane sa South Africa karong Nobiyembre 1 didto sa Mandalay Bay Resort and Casino sa Las Vegas, Nevada.

Ang 25-anyos nga si Donaire wala na makapakita’g aksiyon sukad makapanalipod sa iyang duha ka bakus pinaagi sa eighth round stoppage sa Mehikanong si Luis Maldonado niadtong Disyembre 2 sa miaging tuig didto sa Foxwoods Casino sa Mashantucket, Connecticut.

“Though he hasn’t fought for almost a year now, I don’t think it will bring negative effect to Junjun (Donaire) in his forthcoming title defense,” matud pa ni Guardo, ang two-time “Sportsman of the Year” honoree sa Sportswriters Association of Cebu (SAC). 

Si Guardo maoy presidente sa Uniherb Philippines, nga adunay six-fight contract uban ni Donaire isip official endorser sa Arthro. Ang ubang nailang produkto sa Uniherb mao ang Heartvit, Kidneycare ug Diabet.

Gitug-an ni Donaire nga anaa siya sa maayong kondisyon ug andam na kaayo kini alang sa ilang binakbakay batok ni Mthalane.

Gitay-og ni Donaire ang kalibotan sa boksing dihang mi-iskor kini og makalilisang nga fifth round destruction sa kanhi walay pildeng Australian KO artist Vic ‘The Raging Bull’ Darchinyan aron paglangkat sa double championship niadtong Hulyo 7, 2007 didto sa Harbour Yard Arena sa Bridgeport, Connecticut.

Sa iyang bahin, si Mthalane mikulit og unom ka knockouts sa iyang katapusang siyam ka kadaugan. Sa iyang katapusang away niadtong Hulyo 5 didto sa Jan Smuts Stadium sa East London, Eastern Cape, South Africa, nidaog siya pinaagi sa 12-round unanimous decision batok sa mas daku nga si Hussein Hussein sa ilang IBF eliminator aron maangkon ang kahigayonan sa pag-ilog sa korona nga gihuptan ni Donaire.

Si Hussein (22-1, 15KOs) gitakda untang mohagit ni Donaire (19-1, 12KOs) niadtong Abril didto sa Dubai apan gikanselar kini tungod sa kakulian sa panalapi. – BANAT NEWS