CEBU - Ang M. Lhuillier Sports Development Foundation (MLSDF) Selection mibuylo sa ikatulong kuwarter aron pag-ihaw sa Mandaue Stallions, 77-58 sa ilang exhibition game niadtong Sabado sa gabii didto sa Cesar M. Cabahug Memorial Sports Complex sa barangay Looc, dakbayan sa Mandaue.
Nagkamang ang opensiba sa MLSDF Selection sa pagsugod sa duwa hinungdan nga nabiyaan kini og singko puntos sa halftime, 27-32. Pinaagi sa ilang paningkamot, nakabawi kini sa ikatulong kuwarter diin ilang gilupig ang Stallions sa pinuntosay, 23-6 aron pagposte og 12 puntos nga labaw, 50-38 sa pagsugod sa final quarter.
Wala na mahulga pa ang MLSDF Selection sukad niadto, bisan pa og natipakan ang ilang labaw.
Ang maong duwa kabahin sa kondisyoning sa MLSDF Selection ni multi-titled coach Eddie B. Ybañez alang sa 6th M. Lhuillier Kwarta Padala Under-21 Developmental Basketball League sa Consolacion Sports Complex diin sila ang nanghawod sa Bracket-B sa ilang 3-0 win-loss record.
PUNTOS MATAG USA
MLSDF (77) -- Ferraren 14, Villanil 13, Ybañez 9, R. Cabahug 9, Tabalin 8, Panerio 6, Tulda 5, Dabuco 4, Otida 4, Sebial 4, Padayao 3,
Mandaue Stallions (58) -- A. Cabahug 19, Lacuna 12, Mosqueda 11, Salazar 7, Diapera 5, E. Cabahug 4 (BANAT NEWS)