Red Bull kampiyon sa BAR

CEBU - Gipakuratan sa Red Team nga gipaluyohan ni Emot Salcedo sa Red Bull Barako ang taud-taud nang pagpanastamas sa Gray Team ni Allan Lim ngadto sa mga sakop sa Basketball Association of Ramos (BAR) aron paglangkat sa korona atol sa ilang 2nd conference inter-color tournament pinaagi sa pag-iskor ug 77-63 nga kadaugan aron paglangkat sa korona kaniadtong Miyerkules didto sa Cogon Ramos Sports Complex.

Sikit kaayo ang duwa sulod sa duha ka quarters diin nagpuli-puli lang og labaw ang duha ka teams ingon man sab makadaghan sila magtabla apan nakalabaw gyud og usa ka punto ang Gray sa halftime, 34-33.

Apan nianang pagka third- period, kalit lang namugnaw ang Gray ug daghan na kaayo sila’g sipyat sa ilang mga tirada samtang ang Red nagpatuyang na’g pamuntos aron pagdaug og 14 puntos.

Sila si Bogs Panique ug Gang-gang Navarro maoy miduslit sa rally ug dayon kalit nga nanginit og maayo si Glenn Birao ug si Erwin Ferrer ug niadtong tungora, wala na nila hatagi’g laing higayon nga mosikit ang Gray.

Si Birao, kanhi forward sa CTS Scanner, maoy nangu sa Red Team sa iyang 20 puntos samtang si Ferrer ug Salcedo may 14 ug 10 puntos.

Si Lito Navarro kinsa maoy usa sa nagpabuhi sa dugo sa Gray atol sa unang duha ka quarters, mi-iskor sab og 20 puntos aron pangulohan ang iyang team. Si Rey Jumamil mitampo og 11 puntos ug si Jun Felicitas may 10 puntos.

Sa unang sangka, ang Black Team mitabon sa White Team, 88-77 aron pag-angkon sa ikatulong pwesto.

Puntos kada usa:

Red Bull (77)—Birao 20, E. Ferrer 14, Salcedo 10, Panique 10, G. Navarro 10, Pasana 4, Loreto 4, B. Ferrer 2, Limpangog 2, Leopats 2, Casas 1

Gray (63)— L. Navarro 20, Jumamil 11, Felicitas 10, Cobacha 4, Tejero 4, Lim 4,

Salaritan 4, alesna 3, Pilapil 3. – BANAT NEWS