Hindi hinayaan ng Hapee Toothpaste na magtagumpay ang paghahabol ng Pharex sa final half upang makaganti sa pamamagitan ng 90-84 panalo sa 2008 PBL Lipovitan Amino Sports Cup sa The Arena sa San Juan.
Umiskor ng mahahalagang baskets sina Jervy Cruz at Fil-Am Gabe Norwood sa endgame na naging susi ng ikaapat na sunod na panalo ng Complete Protectors, ikawalo sa kabuuang 11-laro para sa ikalawang puwesto sa likod ng defending champion Harbour Centre na may malinis na 8-0 kartada.
Nauna rito, sumandal naman ang San Mig Coffee sa mainit na shooting ni Neil Raneses upang igupo ang Noosa Shoes, 80-73, para sa kanilang ikatlong sunod na panalo na siya nilang pinakamahabang streak na huli nilang nagawa sa 2006 Heroes Cup.
Nanguna ang 6-foot-4 na si Raneses, nagsumite ng career-high 29 points sa 86-82 panalo laban sa Bacchus Energy Drink, sa kanyang 20 points, kabilang ang apat na sunod na puntos sa stretch.
Umangat ang Coffee Kings sa 5-5 record katabla ang Pharex habang nalaglag ang Shoe Kings sa 4-6 kartada.
Matapos makalapit ang Medics sa 77-83 papasok sa huling 4:10 minuto ng labanan, nagtulong sina Norwood at Cruz sa 7-0 blast upang higit na lumayo sa 90-77 halos dalawang minuto na lamang ang natitira. (Mae Balbuena)