Supersavers-Banilad, Nuggets milansa'g daog

Ang Supersavers-Banilad ug Nuggets miparot sa ilang tagsa-tagsa nga kaatbang sa pagsugod sa 1st Robinson's Supermarket basketball tournament didto sa Visayan Glass Gym sa barangay Guadalupe ning

siyudad.

Si Fidel Cabigas mipabuto og 30 puntos aron pangulohan ang Supersavers-Banilad pagsakmit sa 51-40 nga kadaugan batok sa Falcons, samtang sila si Francisco Bacalso ug Manolit Iligan miabuno og 13 puntos matag usa alang sa Nuggets kinsa milubong sa Astig Bulls sa iskor nga 52-39.

Gawas nga midaog sa duwa, ang Supersavers-Banilad mao sab ang midaog sa "Best in Uniform" ug sa 3-point shootout kortesiya ni Cabigas.

Wala sab hinuon magmahay ang Astig Bulls sa ilang kapildihan kay ang ilang muse nga si Michel Unabia mao ang gikoronahan isip "best muse" sa maong

 torneyo.

Ang Robinson's Supermarket basketball tournament gipaluyohan sab sa Alberto's Pizza, K Gallery  Frames, Beverly Jaen-Johnson, Atty. Jefrey Pabriaga, Darleen Dale Jaen ug Jennifer June Jaen.