UC, ICFC temporaryong nidominar sa ilang tagsa-tagsa ka dibisyon

Ang University of Cebu (UC) ug ang Inter-Cebu Football Club (ICFC) mao karon ang nidominar sa top spots sa cluster A ug B human gipalukapa ang ilang tagsa-tagsa nga kaatbang sa 54th Don Bosco Founder's Day 11-Aside Men’s Open Football Tournament kagahapon didto sa Don Bosco Seminary fields.

Ang UC booters nanghawod sa Bracket-A nga adunay 3-0 win-loss card sa ikaduhang adlaw sa torneyo. Ang UC midaog sab sa ilang kulbahinam nga duwa batok sa University of Southern Philippines Foundation Alumni, 2-1. Gipukan sab nila  ang bag-ong natukod nga No To Drugs Football Club (NTDFC), 3-0 niadtong miaging adlaw.

Ang kanhi Hiroshi Team  nga karon Inter-Cebu Football Club (ICFC) nanghawod usab sa Bracket B nga adunay 2-0 nga baraha.

Naangkon nila ang unang daog niadtong miaging adlaw batok sa Don Bosco United Football Club (DBUFC), 3-0. Nausban kini atol sa ilang duwa kagahapon batok sa Queen City United Football Club (QCUFC), 3-0.

Nipahiluna sa ikaduhang  dapit sa Bracket A mao ang USPF-Alumni nga adunay 2-1 win-loss card human sa ilang kadaugan kagahapon batok sa University of the Philippines Football Club (UPFC), 2-0.

Ang Don Bosco College   niposte sa ilang unang daog pinaagi sa pagpukan sa  San Roque United FC,  2-0.

Ang engkuwentro tali sa Inter Lapu-Lapu FC ug NTDFC miresulta ngadto sa panagtabla, 3-all.