Ang Cebu Landmaster-Mandaue miinat sa nagkadena niining daog ngadto sa upat human giihaw ang bisita ug pak-an nga Duterte Agilas-Davao, 83-72 sa nagkainit nga aksiyon sa 2007 Mindanao Visayas Basketball Association (MVBA) Second Conference niadtong Huwebes sa gabii didto sa Mandaue City Cultural and Sports Complex.
Ang Cebu Landmaster-Mandaue nilang Mayor Jonas Cortes, realtor Joe Soberano ug coach Jun Tan nagsandig sa pagka mabayanihon nilang Harold Santa Cruz, Mark Yee ug Mike Manigo aron pagbuntog sa Agilas ni acting coach Rhoel Josol.
Ang Agilas nakatabla human ma-alkansi og sayes puntos human sa first half, 41-47, apan ang Landmasters milusad og 24-13 rally sa katapusang hut-ong sa duwa aron pagtali sa ikaunom nilang daog nga gi-atbangan og usa ka pilde.
Si Santa Cruz maoy nangulo sa Landmaster sa pagtali niini og 16 puntos, samtang si Yee midugang og 13 puntos. Daku sab og natabang silang Bong Marata ug Richard Ian Saladaga nga nagkumboya og 22 puntos.
Si Buboy Berami miratsada og 18 puntos alang sa Agilas, nga nakatilaw sa ikalima niining sunod-sunod nga kapildihan.
MGA ISKOR
Cebu Landmaster-Mandaue (83)
Santa Cruz 16, Yee 13, Marata 12, Saladaga 10, Ocanada 9, Manigo 8, Nicdao 7, Abellanosa 3, Mangubat 2, Gloria 2, Montalbo 1
Duterte Agilas (72)
Berami 18, Te 11, Gonzaga 10, Delfin 7, Atablanco 6, Sagad 5, Ilanga 5, Delica 4, Mejorada 4, Bajenting 2