7-fight contract gi-junk ni Pacman

Ang Amerikanong promoter nga si Bob Arum mipabuhagay og surprisang anunsiyo kagahapon atol sa post-fight press conference sa Pacquiao-Morales trilogy kagahapon didto sa Thomas and Mack Center sa Las Vegas, Nevada.

Matud pa ni Arum nga si Pacquiao dili na konektado sa Golden Boy Promotions ug ang iyang kompaniya nga Top Rank Inc. mao na ang mo-promote ni Pacquiao sa mosunod nga upat ka tuig.

Mao kini ang gikompirmar dinhi sa Banat News sa Sugbuanong promoter nga si Rex 'Wakee' Salud pinaagi sa long distance telephone call gikan didto sa Las Vegas. Matud pa ni Salud nga ang Top Rank naghiusa og puwersa sa MP Productions aron mogiya sa career ni Pacquiao hangtud sa tuig 2011.

"Tinuod na. Gi-announce ni Bob Arum nga ang Top Rank ug ang MP Productions mao ang mo-promote ni Pacquiao sa mosunod nga upat ka tuig," matud ni Salud nga didto sa maong press conference gumikan kay gawas nga higala siya ni Arum, business partner sab siya ni Pacquiao.

"Actually, dugay na kaayo na nga deal. Wala pa ang ikatulong away nilang Pacquiao ug Morales nahimo nana. Wala lang usa gi-announce ni Arum kay dili siya gusto nga ma-distract si Pacquiao," dugang pa ni Salud.

Si Salud wala na mibutyag sa detalye sa kontrata apan nagkanayon kini nga nindot kaayo ang tanyag sa Top Rank nga dili kabalibaran ni Pacquiao.

Nagkanayon si Salud nga nasayod sab siya nga gi-uli na ni Pacquiao ngadto ni Oscar de la Hoya ang US$500,000 nga bonus nga iyang nadawat human nipirma og pito ka away nga promotional contract sa Golden Boy Promotions sa miaging bulan.

Apan gitaho sa boxingscene.com nga wala dawata sa Golden Boy Promotions ang tseke gikan ni Pacquiao.

Kining labing uwahing hitabo seguradong makahaling og maayo sa nagkainit nga panagkaribal nilang Oscar de la Hoya ug sa kanhi niya promoter nga si Bob Arum.