12 qualifiers sa BSCP National Pool Championship inihayag

Labingdalawang manlalaro ang lumusot sa idinaos na dalawang araw na qualifying tournament ang magpapaganda sa kompetisyon sa 1st BSCP National Pool Championship na sasargo na mula ngayon sa Ninoy Aquino Stadium.

Ang mga ito ay sina Rolando Garcia, Jec Limen, Jundel Mazon, Edgie Geronimo, Richard Pornelosa, Mike Takayama, Roland dela Cruz, Napoleon Labrador, Junbert Ogang, Ricky Gamboa, Nestor Ocampo at Daniel dela Rosa.

Mangunguna naman sa mga paborito ay si Alex "The Lion" Pagulayan na siyang itinalagang top seed sa hanay ng 64 manlalarong magtatagisan sa main draw mula ngayong ika-3:00 ng hapon.

Nasa ikalawang puwesto sa mga seeded players si Dennis "Surigao" Orcullo habang nasa ikatlo ang US base na si Jose "Amang" Parica.

Ang kukumpleto sa talaan ng mga manlalarong nasa unang 16 puwesto ay sina Ronato Alcano, Ramil Gallego, Rodolfo Luat, Lee Van Corteza, Warren Kiamco, Antonio Gabica, Mario Tolentino, Leonardo Andam, Joven Bustamante, Roberto Gomez, Gandy Valle, Jharome Pena at Jeffrey "Bata" de Luna.