Mosley mi-TKO ni Vargas: Away gi-undang ni reperi Joe Cortez sa ika-10 nga hugna

Sa kumbati tali sa duha ka kanhi bangiitang world champions, si "Sugar" Shane Mosley maoy mipatigbabaw human gipukan niini si Fernando"Ferocious" Vargas pinaagi sa TKO sa ika-10 nga hugna sa ilang light middleweight elimination bout kagahapon didto sa Madalay Bay Events Center sa Las Vegas, Nevada.

Impresibo si Mosley pagsugod sa maong eksplosibong engkuwentro diin siya mipatupa og solidong suntok sa ulo hinungdan nga nahubagan si Vargas sa walang bahin sa mata niini sa ikaduhang hugna.

Samtang nagkainit ang away, nagkadako usab ang hubag sa nawong ni Vargas. Sa ikawalong hugna, nagkadugo ang baba ni Vargas ug sa ikasiyam, gibisita siya sa ringside doctor aron sutaon ang iyang kahimtang.

Bisan og wala siya mo-atras taliwala sa agresibong ataki ni Mosley, klaro kaayo nga grabi ang injury nga nahiaguman ni Vargas hinungdan nga giundang ni reperi Joe Cortez ang away sa oras nga 1:22 sa ika-10 nga hugna.

Dismayado gamay si Vargas sa maong desisyon ni Cortez gumikan kay wala siya masayud kon unsay hinungdan sa pag-undang niini sa away.

"I could still see ... I don't know why they stopped the fight. I was taking the fight to him ... I was wearing him down," matud pa ni Vargas sa dihang nahinabi sa 15rounds.com.

Gipasabot hinoon sa opisyal sa Nevada State Athletic Commission nga si Marc Ratner nga ang hinungdan sa pag-undang sa away dili mao ang grabing paghubag nga nakasira sa walang mata ni Vargas kundili mao ang kapakyasan ni Vargas pagdepensa sa mga tuong suntok ni Mosley.

Bugtong katuyoan ni Cortez niadtong higayon mao ang paglikay ni Vargas sa mas peligrosong kahimtang.

"Referee Joe Cortez stops the fight because Vargas could not see the right hands," matud pa ni Mosley, nga naglabaw sa scorecard sa duha ka judges sa iskor nga 86-85. Ang usa ka judge mi-iskor og 86-85 pabor ni Vargas atol sa paghunong sa engkuwentro.

Si Mosley mi-inat na karon sa iyang win-loss record ngadto sa 42-4 uban ang 36 knockouts, samtang si Vargas nakatilaw sa ikatulo niining pilde sa 29 ka away.

Human sa iyang kadaogan, si Mosley way kurat nga mihagit sa tinahud nga si Flloyd Mayweather aron maoy sunod niyang kontrahon.

"The fight I want is against Floyd Mayweather. He is the best out there," dason pang Mosley sigun sa taho sa fightnews.com.