Shark vs Skygo sa pagbubukas ng PBL-CBF Dual meet

Sasabak na sa aksiyon ang paborito sa titulong Regent-Shark at Blu All-Purpose sa magkahiwalay na laban kontra sa Cebu teams sa pagbubukas ngayon ng PBL-CBF Dual Meet II sa University of San Carlos Gym.

Ang Regent-Shark ay babanderahan ng Mutt-and-Jeff tandem nina Rysal Castro at Warren Ybañez upang sagu-pain ang Skygo Riders sa alas-5:00 ng hapon, habang magtitipan naman ang Blu All-Purpose at Cebuana Lhuillier sa alas-7:00 ng gabi.

Ipaparada naman ng Montana Jewels ang kanilang malalaking manlalaro upang tapatan ang tikas ng GMC-Tortillos sa dakong alas-3:00.

Paghihiganti ang pakay ng Cheeseballs-Shark sa kanilang nalasap na 66-67 pagkatalo sa mga kamay ng Skygo Riders sa opening match ng nakaraang 1st PBL-CBF Dual Meet noong nakaraang September 16.

Ngunit sa pagkakataong ito, tiyak na mahihirapan ang Cheeseballs-Shark na magawa ang kanilang misyon dahil humugot ang Skygo ng mahuhusay na manlalaro sa katauhan nina Michael Manigo, Michael Etrata at Ronald Quinahan, kasama sina Jercules Tangkay, Alano Caputolan, David Cabrera, Cesar Romero at Leif Villarin.