John-O kampeon

Nilimitahan ng John-O ang Hapee Toothpaste sa limang puntos sa huling tatlong minuto ng labanan upang makopo ang titulo sa 1st PBL-CBF Dual Meet, 86-70 sa Pasig Sports Center kamakalawa ng gabi.

Nakalapit pa ang Teeth Sparklers sa 65-72, 3:12 pa ang oras sa laro ngunit nagtulong sina Bong Salvador at Al Vergara sa 11-2 run tungo sa 83-67 kalamangan na kanilang naging tuntungan sa tagumpay.

Samantala, bumangon naman ang Casino Rubbing Alcohol mula sa mahinang panimula upang sungkitin ang third place matapos ang 87-78 panalo kontra sa Blu All Purpose.

Tinanghal na Most Valuable Player si Ranidel de Ocampo na kasama nina Lou Gatumbato, Peter Simon, Reynell Hugnatan at Chris Guerrero sa Mythical Five.