Mga sinaligan ni Rama
Segun sa upat ka trabahante sa Cebu City Assessor’s Office–Sybil Ann Ybañez, Filomena Atuel, Maria Almicar Diongzon ug Chito dela Cerna–kansang reklamo nga gilabay sila sa laing mga departamento ug wa masuweldohi og 10 ka buwan maoy gibasehan sa Ombudsman sa pagsuspenso ni Mayor Mike Rama, managlahi ang mga tubag nga ilang nadawat dihang nagsusi nganong gibalhin sila:
• Si City Administrator Colin Rosell niingon nga ang mayor mao ang nagsugo sa pagpabalhin nila; pero
• Si Mayor Rama niingon nga wa siyang kahibawo nga gibalhin diay sila sa laing mga departamento.
* * *
Silang Rosell ug Rama ray nahibawo kinsay nagsulti sa tinuod. Kon si Rosell ang nagsulti sa tinuod, kapila na man nagpagoryo-goryo ang mayor sa kalihokan sa City Hall nga siya diay nagpasiugda? Kon si Rama ang nagsulti sa tinuod, kapila na man si Rosell nigamit sa ngan sa mayor pagpamugos sa mga butang nga siya ra diay ang nagbuutbuot?
Bisan unsa pa, ang kapakyas pagpasabot sa tinuod nga rason sa lahugay, nga gipatuman tangkod na usa ka tuig na sunod buwan, makahatag og ideya nganong nagkaguliyang ang City Hall.
* * *
Ang kontrobersiya nagpakita sa kamasaligon sa magtiayong Rosell pagsukwahi sa lehitimong mga sugo:
• Kaduha gisupak ni City Assessor Theresa Rosell ang sugo sa Civil Service Commission (CSC) pagbalik sa puwesto nilang Ybañez, Atuel, Diongzon ug dela Cerna–una, dihang gi-apelar ang transfer order sa Hunyo sa niaging tuig ug, ikaduha, dihang gibasura sa CSC ang transfer order niadtong Oktubre sa niaging tuig; ug
• Gisupak ni Administrator Rosell ang sugo ni Rama sa Abril ning tuiga nga suweldohan nang upat.
* * *
Niadtong 2012, sa una niyang termino pagkamayor, napaso si Rama human nipirma sa ordinansa nga iyang gisupak. Sa labing bag-ong init nga kaso, gipasanginlang naghangad dihang nipirma sa transfer order nilang Ybañez, Atuel, Diongzon ug dela Cerna. Kalikayan untang mga bulilyaso, bisan di makabasa sa tanang pirmahanan, kun dunay mga kaabag nga kasaligan.
Nga maoy papel nilang Rosell ug kaubanan: Pagseguro nga di masunog ang mayor nga mas naila sa kanta-kanta kay sa pagtuon sa mga dokumento. Mas dakong trahedya kon ang mga naglibot sa mayor mao na hinuon ang responsable sa iyang pagkasugba.
* * *
- Latest
