Prangka nga wala sa lugar

Dear Tito Miguel,

Ako diay si Excel, taga Minglanilla, Cebu. Aduna ko’y uyab nga ginganlan og Giana. Ang akong uyab kay usa ka tawo nga prangka kaayo manulti. Kung unsay iyang mahunahuna, iya gyud nang isulti diretso. Dili siya mahadlok mopadayag sa iyang opinyon, apan usahay masobraan. Adunay mga higayon nga ang iyang mga pulong makapasakit na sa pagbati sa ubang tawo. Ang nakapait pa gyud kay murag wala siya masayod nga nakainsulto na diay siya o nakapasakit na sa iyang kaistorya. Para niya, nagsulti lang siya sa tinuod, apan alang sa uban, sakit na kaayo paminawon ang iyang mga pulong.

Ako na siya giingnan kalabot sa iyang batasan. Ako siya nga wala may problema kung prangka ta nga pagkatawo, apan kinahanglan nga magmatngon siya sa iyang isulti nga dili makapasakit sa uban.

Bisan pa sa akong mga tambag, wala gyud nausab ang iyang batasan. Igo ra siya moingon, nga mao na gyud na iyang batasan ug wala ra siya’y pakialam sa reaksyon sa ubang tawo.

Gahi gyud siya og kasingkasing, unsaon mani nako siya? — Excel

* * *

Excel,

Giistoryahan na man kaha nimo tanan apan dili maminaw, gani wala siya’y pakialam kun makapasakit siya sa uban, pasagdi na lang. Dako na man siya, dagko na sad mo nagkita, lisod na usbon, ka’y natural na niya.

Kun mausab man siya, dili na tungod sa imong mga pahimangno, apan tungod sa resulta sa iyang hait nga mga istorya. Lagmit ang uban niyang mga higala o kaila mo-distansiya na niya. Ang uban gani basin mosukol pa niya’g mag-away pa sila. Kun dili gihapon siya motagam, pasagdi lang gihapon hangtod nga siya makaamgo nga hinay hinay na man nangawala iyang mga higala ug kaila.

Ang tinuod, mapugngan gud na niya iyang baba, nakamenos lang siya sa mga tawo nga yano yanohon ra niya’g insulto. Paniid, lagmit mamili siya. Kun atubangan sa labaw niya, dili siya maka-prangka. Pero kun iyang tan-aw nga pareha ra niya’g estado sa kinabuhi o samot na kun ubos para niya, wala siya’y preno. Kun mao, mahimo diay niya pugngan.

Pero ka’y lagi di man maninaw, pasagdi lang, hangtod nga makakita siya’g away o mapasakaan ba kaha’g kaso. Kun mahitabo na, duna gihapo’y purohan nga dili mag-usab, mosamot pa hinuon kay natandog ang garbo. Natural gani . Arogante pa gyud nga dili mag-usab maski kahibawo siya nga sayop iyang gibuhat. Ang puwede nimo usbon ang imong desisyon, hunahunaa kuno kun kamo magkadayon, andam ba ka nga mag sige la’g badlong o panagang para niya? — Tito Miguel

Magpatambag ka? Ipadala kang Tito Miguel: 0991-318-9366