Bulag na gyud

CEBU, Philippines — Nagbulag na matud pa sila si Enrique Gil ug Liza Soberano human sa walo ka tuig nga relasyon. Kini suma pa sa kasaligang tinubdan sa kanhi talent manager ni Liza nga si Ogie Diaz. Ang tsika, mas gipili ni Liza nga ipunting ang iyang atensyon sa iyang pagpanimpad sa Hollywood.

Wala mataypi

Nibuto ang tsika nga usa ra ka season ang Face 2 Face sa TV5, ug tapuson na kini. Suma pa, nega sa advertisers ang host niini nga si Karla Estrada. Komento sab sa netizens, dili makamao mo-host si Karla, perte matud pa ka laay. Panawagan nila, ipadayon ang show ug ibalik si Amy Perez o Gelli de Belen isip host.

Nag-unay!

Pilde ang Dirty Linen sa bag-ong teleserye nga Unbreak My Heart nga nilugwa na sa GMA7 sugod niadtong Lunes. Basi sa ratings nga gipagawas sa GMA7 niadtong Martes, ang Unbreak My Heart nitala og 6.9%, samtang ang Dirty Linen, 4.9%. Ang naka alegre niini mao nga puros Dreamscape Entertainment sa ABS-CBN ang nimugna sa duha ka teleserye. Kini kay ang Unbreak My Heart nga gibituonan nila ni Richard Yap, Gabbi Garcia, Joshua Garcia ug Jodi Sta. Maria, collaboration project man sa ABS-CBN, GMA7 ug streaming app nga Viu. Samtang bida sa Dirty Linen si Janine Guttierez ug gisuportahan sa mga banggiitan nga sila si John Arcilla, Angel Aquino, Joel Torre, Epy Quizon, Janice de Belen ug Tessie Tomas.

Reklamador

Gikataw-an sa beteranang kolumnista Lolit Solis ang tsika nga niatras matud pa si Willie Revillame sa giplano nga concert tour sa abroad gumikan kay gidak-an kini sa kuhaon sa Viva Entertainment sa iyang kita. Matud ni Lolit, nasayud na ang Viva unsay angay buhaton sanglit batid na kini sa paggama og mga shows sa gawas sa nasud. Ni Lolit pa daghan kaayong reklamo si Willie nga basin pa unta og maong concert tour maoy mobanhaw sa laos na nga career niini. Suma pa niya, daghang sikat nga talents ang Viva, busa dili problema niini kun dili mopadayon si Willie. Mas sikat niya pa ang mga talents sa Viva intandi kang Willie, busa hayan mas mokita pa ang mga shows niini sa abroad.

Wow na Wow!

Record-breaking ang online views sa tulo ka mga primetime teleserye sa ABS-CBN niadtong Martes. Ang FPJs: Batang Quaipo, nitala og 408, 614 concurrent live views. Sa maong episode, namatay na ang karakter ni RK Bagatsing nga si Greg human na-engkwentro niini ang grupo ni Tanggol (Coco Martin). Ang Iron Heart, nihipos og 304, 208 concurrent live views, o ang kasamtangang nagtan-aw gyud. Ang Dirty Linen adunay 109, 410 concurrent views. Sa maong episode, nabutyag na ang gilaraw nga pagpanimalos ni Alexa (Janine Gutierrez).

Nipirma sa TV5...

Nakapirma na og konrata sa TV5 ang TVJ o sila si Tito, Vic, ug Joey. Suma pa sa tinubdan sa Philippine Entertainment Portal (PEP), nahitabo ang conrtract signing niadtong Lunes, May 29, kauban ang big boss sa TV5 nga si Manny V. Pangilinan.

Ang wala pa lamang matino mao ang unod sa maong kontrata. Ang maong tsika, nilugwa taliwala sa wala damhang pagpanamilit sa TVJ sa Eat Bulaga, ug sa Tape Inc., ingon man sa ilang viewers kagahapon.

Una niini, daghan ang nahibulong nganong replay ang nilugwa sa Eat Bulaga kagahapon. Apan paglabay sa dul-an usa ka oras, nilugwa live sa Youtube channel sa maong noontime show ang TVJ kauban ang uban pang co-host.

Gibutyag nila nga naa ra sila sa studio sa Eat Bulaga apan gidid-an sila nga magprograma niadtong tungora.

 "Pumasok po kami ngayong araw para magtrabaho, pero di po kami pinayagang umere ng new management nang live. Hindi po kami pinayagang mag-live ng new management," pagpaambit ni Tito.

Lakip sa mga kauban nila didto sila si Jose Manalo, Wally Bayola, Allan K, Paolo Ballesteros, Maine Mendoza, Ryzza Mae Dizon, ug Ryan Agoncillo.

Samtang sila si Vic ug Joey ang mga networks nga ilang nakauban sulod sa 44 ka mga tuig sa telebisyon nga naglakip sa RPN9, ABS-CBN ug GMA7. Nagpasalamat sab sila sa mga advertisers nga nisuporta kanila.

Nine years nga nakita sa RPN 9 ang Eat Bulaga, unom sila ka tuig sa ABS-CBN, ug 28 years na sa GMA7.

“Hanggang sa muli”

Gipasalamatan sab ni Tito ang mga dabarkads nga kanunay nagsuporta nila, si Mr. Tony Tuviera sa ilang panaghigala ug kanunayng suporta, ug ang GInoo nga wala gyud matud pa nibiya kanila bisan kanus-a.

Niining tungora, niginhawa og lawom si Vic, ug gibatbat na ang ilang pagpanamilit.

"Hindi na po namin isa-isahin ang laman ng aming mga puso at damdamin. Ang hangad lang po namin ay makapagtrabaho nang mapayapa, walang maaagrabyado, at may respeto sa bawat isa."

"Simula ngayong araw, May 31, 2023, kami po ay magpapaalam na sa TAPE, Incorporated.

"Karangalan po namin na kami nakapaghatid ng tuwa't saya, mula Batanes hanggang Jolo at naging bahagi ng buhay ninyo.

"Maraming-maraming salamat sa inyong lahat. Hanggang sa muli! Saan man kami dalhin ng tadhana, tuloy ang isang libo’t isang tuwa."

Samtang gikaguol sa GMA Network ang nahitabo sa Eat Bulaga ug nanghinaot nga unta masulbad ang sitwasyon niini.

Aduna pay kontrata ang Eat Bulaga sa GMA7 hangtud sa katapusang bahin sa 2024.

Pagka Gwapa!

Usa sa labing maanyag, kun dili man maoy labing maanyag sa tanang Miss Universe Philippines. Ingon niana ang reaksyon sa followers ni 2019 Miss Universe Philippines Gazini Ganados--kinsa pambato sa Talisay City, Cebu niadtong tungora--human nakakita niining maong mga hulagway nga iyang gi-upload sa facebook niadtong Martes sa gabii. Lakip sa presenter sa bag-o pa lamang nahuman nga Bb. Pilipinas 2023 si Gazini, kinsa gitakdang molugwa isip host sa umaabot nga sports/ travel show sa youtube.

Designer:  @richsabinian

Styled by: @vheecostyle

AsstdBy:  @juancho.styles

Touch up: @japethmike_purog and @heartyabadzafra

Photo : @feliciano.mj