Ning Huwebes Santo

Dunay mga makahuloganong kalihukan karong adlawa sa Hwebes Santo. Una ang pagsaulog sa Santos nga Misa. Diin sulod niini himoon usab ang pagpanghugas sa mga tiil sa mga apostoles. Ug sa katapusan himoon usab ang pagbalhin sa santisimo sakramento alang sa pagbilar niini. Ang altar mamahimong huboan sa mga tabon niini ug mamahimong hilom ang tanan.

Ang Hwebes Santo pahinumdom alang kanato diin gitukod ni Kristo Jesus ang duruha ka mga Sakramento. Ang Sagrada Eyukaristiya ingon man ang Orden sa pagkapari. Nagpasabot kini nga kun walay pari wala usab ang Sagrada Eyukaristiya. Ang Sagrada Eyukaristiya mao man ang kinabuhi ug sukaranan sa matag Kristohanon. Ang Sagrada Eyukaristiya pagkaon alang sa atong kalag ug bawon nato padung ngadto sa laing kinabuhi. Ang Orden sa Pagkapari mao man ang sakramento sa pagpili og mga tawo o mga lalaki nga mopadayon sa bisan unsang nasugdan ni Jesus.

Wala isipa ni Jesus nga VIP siya isip ilang lider o pangulo. Mao nga si Jesus naghugas sa mga tiil sa iyang mga tinun-an. Simbolo kin isa usa ka mapaubsanong pagpangalagad. Ning paagiha nahimong mas konkreto ang iyang sugyot sa iyang pag-ingon: Paghinugasay kamo! Sa ato pa pag-inalagaray kamo! Ang tinud-anay nga pagpangalagad nagpasabot man nga diha sa imong paghaw-as sa nagkalapok andam usab kang motunob sa lapok.

Taliabot na ang piniliay. Unta daghan ang mohimo og mas halawom nga pag-ampo ug pamalandong sa dili pa kita mohimo sa atong pagpili. Nagkatun-as na ang moralidad sa kadaghanan kanato. Apan basin unya og mahisama kitang Pilato nga manghunaw sa atong mga kamot kay mas gipili man nato si Barrabas kay sa kang Kristo Jesus. Si Kristo Jesus nga anaa sa dagway sa atong mga kaigsuonan nga nag-ilaid sa kalisud samtang padayong nagmalipayon ang mga mapahimuslanon.