Lingiw bang tanan?
Ambot nitibugsok na bang atong pangandoy sa ligdong nga liderato. O nawad-an na lang og paglaom. Dili ta ganahan og pangurakot. Dili ta ganahan og pangabuso sa gahom. Gawas lang kon ang atong paboritong grupo o mga politiko nay pasanginlan:
• Si Presidente Ferdinand Marcos Jr. nakonbikto og tax evasion ug wala pa mobayad sa multa nga gipahamtang sa Quezon City Regional Trial Court. Kalimtan na lang kay mas kuyaw kon mapulihan ni VP Sara.
* * *
• Klaro nang gibolsa ni Bise Presidente Sara Duterte ang P612.5 milyones niyang confidential funds sa Office of the Vice President ug Department of Education. Pero unahon pag-imbestigar ang binilyon ka pesos nga kawat sa flood control scandal.Grabeha sa plunder ug money laundering ug P142.7 bilyones nga insertion sa 2025 budget ni kanhi Senate President Chiz Escudero. Unya na imbestigahon kay siya ray maka-preside sa impeachment trial.Kadako sa P56 bilyones nga gipasangil nga nabolsa ni kanhi House Speaker Martin Romualdez tungod sa maniobra sa flood control projects. Pasalamatan gihapon kay siyay nakasugod sa imbestigasyon nga nakahipos sa mga ebidensiya sa impeachment ni VP Sara.
* * *
• Pamintaha man kining pagpakatap sa posters ni Heneral Nicholas Torre bisan layo pang eleksiyon sa 2028. Ok ra kay isog siyang nidakop nilang kanhi Presidente Rodrigo Duterte ug Apollo Quiboloy.Kangil-ad og mga balikas ni VP Sara, nangulata og court sheriff ug nanghulga pa gyod sa presidente. Mao nay angayng sunod nga presidente, isog ug guwapa.Kadaghan sa 35,000 nga laktod nga gipamatay sa drug war ug kadako sa P42 bilyones nga Pharmally scandal ni Duterte. Garbo siya sa mga Bisaya, Sugbuanon sang amahan.
* * *
• Pakyas si Cebu City Mayor Nestor Archival pagsulbad sa baha ug basura. Arang-arang gihapon kay dili sama ka-pakauwaw nilang Mike Rama ug Raymond Garcia.Wala gyoy nakabadlong ni Cebu Governor Pam Baricuatro nga sige og TikTok? Mas maayong mosayaw kay ni kanhi Gobernador Gwen Garcia.Imposible nga wala kabahin si BBM sa P1.7 trilyones nga kinawatay sa flood control scandal. Bakak sab ang iyang pangangkon nga walay ill-gotten wealth ang ilang pamilya kay na-absuwelto sila sa tanang kaso. Sagdi lang, disente man og sinultihan ug dili mamalikas.
* * *
- Latest
