Angay paspasan

Mipasaka na og kaso ang National Bureau of Investigation (NBI) batok sa mga nalambigit sa anomalya sa flood control projects sa ikatulong distrito sa lalawigan sa Sugbo.

Nagpakita kini nga seryoso ang otoridad sa kampanya batok sa mga iregularidad.

Apan kinahanglan nga dili angay langayon ang proseso sa hustisya.

Atong gipaabot ang paspas nga resulta sa maong kaso aron makab-ot ang kamatuoran ug masilotan ang mga responsable.

Gani, ang kalangan sa proseso makapahuyang sa kredibilidad sa mga institusyon ug makasugnod hinuon sa kasuko sa katawhan.

Ang flood control projects gitumong aron protektahan ang komunidad batok sa baha.

Kung kini himoong instrumento sa korapsyon, doble ang kadaut nga madawat sa katawhan.

Ang NBI ug hudikatura kinahanglan magtinabangay pag-arangkada sa proseso.

Ang ebidensiya kinahanglan ipresentar sa tukmang paagi, ug ang korte kinahanglan molihok nga walay paglangan.

Ang transparency ug accountability mao ang yawi aron mabalik ang pagsalig sa katawhan.

Kadong nalambigit sa anomalya dili angay nga makalikay sa silot.

Ang hustisya kinahanglan ipatuman sa tanan, bisan pa kon si kinsa.

Kini aron ipakita nga seryoso ang gobiyerno pagpakigbatok sa korapsiyon.