Utang sa nasud misamot og burot

Gitaho sa Bureau of Treasury niadtong miaging Biyernes nga miabot na sa P14.79 trilyones ang utang sa Pilipinas sa buwan pa lamang sa Enero ning tuig 2024. Kini tungod pa sa paghinay sa balor sa salapi sa nasud ug tungod usab sa pagsige og pangotang sa administrasyong Marcos.

Sa gipagawas nga pamahayag sa Bureau of Treasury, giingon niini nga ang pagtambok o pagburot sa utang sa nasud nagasukad sa gipangpagawas nga domestic securities ug sa paghinay sa balor sa peso o salapi sa nasud.

Sa pagkakaron ang utang sa nasud ngadto sa mga lokal nga financial institutions mikabat na og P10.16 trilyones ka pesos o 68.71 porsiyento sa kinatibokang utang sa nasud nga may pagsaka nga 1.44 porsiyento sa orihinal nga utang.

Gitugan sa Bureau of Treasury nga niadtong buwan sa Enero ang kinatibokang halin sa domestic debt securities sama sa Treasury bonds ug Treasury bills miabot og P211.11 bilyones samtang ang gobiyerno mibayad og P69.67 bilyones sa iyang mga utang sa mga lokal financial institutions nga pulos na mga bayranan.

Tungod niini, ang gobyerno mipagawas og P141.44 bilyones.

Sa laing bahin, ang paghinay sa balor sa peso kontra sa dolyar maoy nakapaburot sa balor sa utang sa nasud sa mga lokal financial institutions tungod kay nakabasi kini sa balor sa dolyar, nga miabot sa P2.81 bilyones niadtong buwan sa Enero.

Sigun sa datus sa Bureau of Treasury ang balor sa peso kontra dolyar anaa kini sa P56.403 sa matag usa ka dolyar sa kataposang bahin sa buwan sa Enero kun itandi sa P55.418 lamang sa kataposang bahin sa buwan sa Disyembre 2023.

Ang pagpangutang gikinahanglan sa gobyerno aron makahatag kini sa panginahanglan sa iyang katawhan. Ang gobiyerno pariha ra kini sa atong mga ginikanan nga wala ug tuo ang utang aron lang may ikasuporta ug magasto sa panginahanglan sa pamilya.

Ang ako lang panghinaut nga unta ang giutang sa gobyerno mapunta ngadto sa angayang dapatan niini ug dili unta mapunta ngadto sa mga bagangang buaya.