Yanong panahom  

Usa sa mga Post Resurrection Narratives mao kadtong higayon diin dunay kaugalingong moment sila si Jesus ug Pedro.  Ato kining Mabasa sa Juan 21;5-19. Diin sa makatulong higayon iyang gipangutana si Simon Pedro og:

“Gihigugma mo ba ako Labaw sa Tanan?” Ug si Pedro nitubag nga gihiguma niya ang Ginoo.

Makatulo nga pangutana, makatulo usab tubaga: Sayud ka Ginoo nga gihigugma ko ikaw labaw sa tanan!” Makatulo ang pahimangno:

“Atimana ang akong mga Karnero!” ug sa katapusan siya gidapit: “Sunod Kanako!”

Sa kinabuhi sa pagkapari anaa ang defining moment. Ang defining moment mao kadtong panahon o higayon nga ang usa ka tawo nakahukom nga mosulod siya sa seminaryo dunay nakahatag kaniya og kadasig.

Sa laing bahin, alang kang Pedro kadtong wala silay kuha nga giingnan sila ni Jesus nga itaktak ang ilang mga pukot ug nakakuha sila og daghang mga isda. Si Pedro human makaamgo niluhod ug nagkanayon sa Ginoo: “Palayo Kanako Ginoo! Usa ako ka Makasasala!” ug gipasaligan siya sa Ginoo:

“Ayaw kahadlok, sukad karon managat ikaw og mga tawo!” Tawo si Pedro ug mahuyang ug gani nahimo siyang maluibon sa Ginoo. Iya siyang gilimod sa makatulo.

Apan ang maong impure nga binuhatan maoy nakaphimo niyang nakaamgo sa dako niyang sayop busa iyang gipakamatyan ang  iyang pagtuo sa kamatayon sa usa ka martiryo.

Sa kinabuhi sa pagkapari usahay ang pari nagtuo nga siya usa ka dakong pakyas! Pakyas sa iyang kaugalingon! Ug pakyas sa iyang pangalagad! Pakyas sa iyang tinguha sa pagkabalaan!

Apan bisan pa man kun ingon ini ang iyang yanong panahom sa kaugalingon bisan pa man kun sa iyang tan-aw siya pakyas apan ang iyang paningkamot pastoral nakahikap diay sa kinabuhi sa uban.

Tawhanon ug masalaypon apan ang grasya sa Dios maoy angayang palihokon.

Salamat sa National Retreat for Priests 2023 unta mobagting ang panawagan ug hagit nga ang pagkapari tawag diay sa pagkabalaan dili lang sa functional nga kinabuhi kondili diha usab sa iyang interior life.

Daghang mga maayo, kugihan ug mga makinaadmong kaparian ang nahitumpawak tungod kay wala nila palamboa ang ilang relasyon kang Kristo Jesus ang ulusahon ug labaw’ng Pari.

Hinaut unta nga ang gisugdang maayo sa Dios sa kinabuhi sa mga kaparian, iyang tapuson alang sa kahimayaan sa iyang ngalan!