Abusadong higante

Kuha kaayo ug nakita sa atong mga mata ang gihimo nga pagpangharas sa Chinese Coast Guard ngadto sa mananagat nga gustong managat sa Scarborough Shoal (Bajo de Masinlok) o Panatag Shoal.

Ang maong eksina nakita nato sa video photage sa GMA 7 nga balita diin ang sakyanan sa mananagat hapit na lamang dasmagan sa sakyanan sa Chinese Coast guard. Ang Chinese Coast Guard isog usab nga mibugaw sa mga sakay sa barko nga iya sa Bureau of Fisheries and Aquatic Resources o BFAR.

Gawas sa gihimong pagpangharas, gibutangan na usab sa China og boya ang entradang bahin sa Panatag Shoal nga nagpasabot nga dili kini nila paagian.

Ang Panatag Shoal anaa mahimotang sa 200 nautical ka milya nga gitawag og Exclusive Economic Zone sa Pilipinas. Gibana-bana kini nga anaa sa 500 ka nautical ka milya gikan sa nasud nga China. Adunay tulo ka komponent ang teritoryo sa mga nasud (ilabina kadtong anaa mahimutang daplin sa dagat) nga mao ang terrestrial domain o kayutaan, fluvial or maritime domain o dagat ug aerial domain o kawanangan.

Ang fluvial o maritime domain o dagat gibahin kini ngadto sa upat ka zone basi sa UNCLOS o United Nation Convention of the Law of the Sea nga mao ang 1. territorial sea (12 ka nautical ka milya gikan sa baseline sa nasud), 2. internal waters o tubig dagat nga anaa sa sulod archipelago (alang niadtong mga archipelago nga nasud), 3. contiguous zone o sumpay o sikbit nga dagat (24 ka nautical ka milya kini gikan sa baseline sa nasud). Ang nasud adunay gahum niining bahina sa dagat sa pagsilot niadtong mga malapason sa balaud sa customs, immigration ug sanitation aron mapanalipdan ang nasud. 4. Exclusive Economic Zone o Patrimonial sea (200 ka nautical ka milya ang gilayon niini gikan sa baseline sa nasud). Ang nasud adunay katungod sa resources nga anaa niining maong dagat, sa tiilan niini ug sa kinailawman niini. Hinuon kining maong katungod dili makaapektar sa ubang nasud nga makalabigar sa dagat ug sa kawanangan nga tungod niini.

Klaro kaayo nga dili iya sa China ang Panatag Shoal kun dili iya kini sa Pilipinas. Pero nganong naghawod-hawod man siya sa maong dapit? Nagabuso lang siya sa iyang pagkahigante.