Sa kataposang upat ka tagduma sa Malakanyang, si Presidente Ferdinand Marcos Jr. ang iwit sa gidaghanon sa mga rehiyon nga nakapa-uminto sa suholan sa unang tuig sa ilang administrasyon:
· Una si anhing Presidente Noynoy Aquino, tanang 17 ka rehiyon nakapa-uminto sa suholan sa iyang unang tuig;
· Ikaduha si kanhi Presidente Rodrigo Duterte, 11 ka rehiyon ang dunay uminto;
· Ikatulo si kanhi Presidente Gloria Macapagal-Arroyo, siyam ka rehiyon ang nakapasaka; ug
· Iwit si Marcos, Metro Manila ray nakapasaka sa suholan niadtong Hulyo 16, lapas sa iyang unang anibersaryo sa Hunyo 30.
* * *
Gawas sa National Capital Region (NCR) wage board, nga niaprobar og umintong P40 sa inadlaw’ng minimum nga suweldo, wa pay ek ang ubang rehiyon, apil nang ato sa Central Visayas. Ubos sa balaod nga nagtugot og usa ra ka uminto kada tuig, ma-umintohan na untang suweldo sa mga trabahante sa Sugbo, Bohol, Negros Oriental ug Siquijor niadtong Hunyo.
Pero wa magdali ang mga sakop sa atong wage board. Nagpaabot sila og Hulyo una nisugod sa konsultasyon, nga ilang giinat hangtod Agosto, ug Septiyembre pa sila mohukom kon pilay uminto.
* * *
Ang mosunod nga mga sakop sa wage board sa Central Visayas nagdawat og suweldo gikan sa atong buhis:
· Chairperson Lilia Estillore, regional director sa Department of Labor and Employment (DOLE);
· Government representative Maria Elena Arbon, regional director sa Department of Trade and Industry (DTI);
· Government representative Jennifer Bretaña, regional director sa National Economic and Development Authority (NEDA);
· Labor sector representative Antonio Cuizon;
· Labor sector representative Nora Analyn Diego;
· Management representative Joseph Tanco; ug
· Management representative Philip Tan.
* * *
Gitahasan sila sa makiangayong pagsubli sa suholan, di sa pagluok sa mga trabahante. Nga, kon basehan ang reklamo sa nangaging labor sector representatives, kanunay’ng nahitabo. Gipasanginlan nilang taga NEDA ug DTI nga nipabor sa mga negosyante.
Kinsa, bisan unsa pa kamakiangayon ang mga petisyon sa uminto sa suholan, moinsistir nga itlog ray ihatag sa mga trabahante. Aron di maalkanse ang ilang ginansiya.
Si Estillore, sama sa nangaging chairpersons, makabotar lang kon dunay tabla. Kay klaro mang resulta, gilikayan nilang botasyon. Giagi lang og sabutsabot. Maong gikaintapan ang atong wage board nga iwit (kinauwahiang molihok) ug tihik (kinagamyag uminto).
* * *