Gisang-at ni Cebu City Councilor Rey Gealon ang Ordinansahon nga giulohan og Cebu City Senior Citizens Parking Exemption Ordinance 2023.
Tumong niining maong ordinansahon ang pag-exempt sa mga senior citizens sa pagbayad og parking kun mobisita sa mga establisamento, tindahan, tambalanan, klinika ug susamang establisamento sa siyudad.
Hinuon ang ordinansahon wala maglakip sa overnight parking, valet parking, public street parking spaces, dapit o edipisyo nga debotado nga parking ug dili konektado sa mga establisamento sa negosyo.
Ang ordinansahon kun ugaling maaprobahan mapahamtangan og silot ang mga makalapas niini og P1,500 alang sa unang kalapasan, P2,000 sa ikaduhang kalapasan ug P5,000 alang sa ikatulong kalapasan ug pagkapriso og usa ka tuig depende sa diskresyon sa huwes.
Kining maong ordinansahon nakakuha og pagsuporta sa mga negosyante nga mitambong sa gipatawag nga public hearing. Apan usa sa mga representante sa mga negosyante mipadayag nga ang libre nila nga parking kutob lamang sa unang tulo ka oras ug ang mosunod nga mga oras ila na kining kolektahan og bayad pero subject hinuon kini sa 20 porsiyento nga diskuwento basi sa senior citizen nga balaud.
Ang ordinansahon nga gisang-at ni Konsehal Rey Gealon makatabang kini sa mga senior citizens bisan tuod akong naobserbahan nga daghan nang mga establisamento dinhi sa dakbayan sa Sugbo ang naglibre na sa mga senior citizen nga mobisita sa ilang establisamento.
Mas maayo nga aduna gayod ordinansahon nga magpalig-on sa libre nang parking sa mga senior citizens aron dili na gyod kini mabakwi kay bisan unsang orasa mahimo ra nga mabakwi sa mga establisamento nga naghatag og libreng parking sa mga senior citizens.
Angayan og matarong gayod nga mohatag og libreng parking ang mga establisamento sa mga senior citizens tungod kay dili sila maalkanse niini kay pila lang ka book nga senior citizens ang adunay sakyanan.